काठमाडौं । नेपाल सुपर लिग (एनएसएल)मा डिफेन्डिङ च्याम्पियन काठमाडौं इलिमिनेटर चरणबाटै बाहिरिएको छ।
मंगलबार भएको खेलमा काठमाडौँ छिमेकी क्लब ललितपुरसँग ३–० ले स्तब्ध बन्यो। ललितपुरले भने समूह चरणको अन्तिम खेलसँगै गत संस्करणमा काठमाडौँसँग क्वालिफायरमा भोगेको ३–० को हारको मिठो बदलासमेत लिन सफल भयो। अब फाइनल प्रवेशका लागि ललितपुर र पोखरा भिड्ने छन्।
दशरथ रंगशालामा मंगलबार साँझ भएको खेलमा ललितपुरलाई जिताउन इमोह इजेकेलले २ तथा पापा इबोउले १ गोल गरेका थिए। ललितपुरले खेलको ३६ औँ मिनेटमा इमोह इजेकेलको गोलमार्फत खेलमा अग्रता लियो। पापा इबोउ केबेले गरेको प्रहार काठमाडौँका गोलरक्षक अन्जल महर्जनले वानटच समाउन नसकेको बललाई रिबाउण्डमा अनमार्क रहेका इमोहले सहज रुपम पोस्टको दिशा दिएका थिए।
पहिलो हाफमा नै अग्रता दोब्बर बनाउने क्रममा खेलको ४४ औँ मिनेटमा अन्नतको कर्नर कुलदीप कार्कीले क्लियर गर्दा क्रसबारमा लागेर फर्किएको बलमा पापा इबोउ गोल गर्दा ललितपुरले पहिलो हाफमा नै सहज अग्रता बनायो।
दोस्रो हाफमा पनि ललितपुरले आफ्नो राम्रो लयलाई निरन्तरता दियो। ५२ औँ मिनेटमा इमोह इजेकेलले व्यक्तिगत दोस्रो गोल गर्दै ललितपुरलाई ३–० को अग्रता दिलाए। इमोहले निखिल कदमको फ्रिकिकमा आकर्षक हेड गर्दा काठमाडौँ खेलमा ३–० ले पछि रह्यो। खेल अवधिभर काठमाडौँले सीमित मात्र अवसर बनाए पनि गोल गर्न असफल हुँदा सान्त्वना गोलबाट समेत विमुख भयो।
७४औँ मिनेटमा काठमाडौँ १० खेलाडी सीमित हुन पुग्यो। कप्तान अन्जन राई दोहोरो पहेंलो कार्ड खाँदै मैदानबाट बाहिरिएपछि दबाबमा खेलिरहेको काठमाडौँ थप दबाबमा परेको थियो।
प्रतियोगिताको फाइनल प्रवेशका लागि क्वालिफायरमा अब ललितपुरले पोखरा थन्डर्ससँग बिहीबार प्रतिस्पर्धा गर्नेछ। लिग चरणमा शीर्ष स्थानमा रहेको पोखरा पहिलो क्वालिफायरमा धनगढी एफसीसँग टाइब्रेकरमा पराजित हुँदा दोस्रो क्वालिफायरमा ललितपुरसँग भिड्ने छ।
