हालै मात्र नेपाली कांग्रेसले मेलमिलाप दिवस मनायो । तत्कालीन बीपी कोइरालाको पालामा भारतमा निर्वासित उनी मेलमिलापको अवधारणा अघि सार्दै नेपाल फर्किएका थिए । राजा महेन्द्रले पञ्चायती व्यवस्था ल्याएपछि निर्वासित भएका उनी लामो समयपछि राजासँग नै सहकार्य गर्नुपर्ने धारणासहित नेपाल फर्किएका थिए । बीपीको त्यही पुनरागमनलाई नै कांग्रेसले मेलमिलाप दिवसको रुपमा बनाउँदै आएको छ । बीपीको पालामा देशको त्यतिबेलाको अवस्था र अहिले भने आकाश जमिनको नै फरक छ । संघीय व्यवस्था अभ्यास गरिरहेको देशमा अहिले राजनीतिक दलमा नै नयाँ र पुरानाबीच संघर्ष छ । देशको अवस्थाअनुसार भने के पुराना के नयाँ, के कांग्रेस, के कम्युनिस्ट सबैबीच मेलमिलाप जरुरी देखिएको छ ।
मुलुकमा राजतन्त्रको अन्त्य र लोकतन्त्र तथा गणतन्त्रको बहाली भएको पनि डेढ दशकभन्दा बढी बितिसकेको छ । तर, यो अवधिमा राजनीतिक दलबाट गरिएको अपेक्षाको नतिजा हेर्दा भने निराशाजनक नै छ । वर्षौंदेखि सत्ताको बागडोर सम्हालिरहेका दल तथा तिनका नेता नै जनतालाई सुशासन र विकास दिन सकिरहेका छैनन् । देशको आर्थिक अवस्था अधोगतिमा छ । भ्रष्टाचार र अनियमितता दिनप्रतिदिन बढ्दो छ । बेरोजगारीको समस्या चरम छ भने सर्वहारा वर्ग महँगीको मारमा परिरहेको छ । रेमिट्यान्सको भरमा चलिरहेको देशको अर्थतन्त्र कुन बेला धरापमा पर्ने हो भन्ने टुंगो छैन । विकास निर्माणका योजना वर्षौंदेखि अलपत्र छन् । काम गर्नुपर्ने ठेकेदारहरु आयोजना ओगटेर र म्याद थपेर बसिरहेका छन् ।
देशको यस्तो अवस्था हुनुको मुख्य कारण हो, पुरानै दल तथा नेताको हालिमुहाली, दलहरुबीच असमझदारी र विकासप्रति नेताको उदासीनता । डेढ दशकयता मुलुकमा व्यवस्था परिवर्तन भए पनि नयाँ नेतृत्व खासै देख्न पाइएको छैन । हुन त माओवादी जनयुद्ध गरेर शान्तिप्रक्रियामा आएको हो । तर, यो पार्टीले पनि पुरानै राजनीतिक दलको प्रवृत्ति अँगालेपछि यसका नेताहरुमा पनि नयाँपन बाँकी रहेन । डेढ दशकयताको चुनावमा कुनै पनि दलहरुले बहुमत ल्याउन सकेका छैनन् । अघिल्लो चुनावमा वाम गठबन्धनले बहुमत हासिल गरे पनि ५ वर्ष सत्ता सञ्चालन भने सम्भव भएन । अस्थिर सरकार, राजनीतिक माहोल र नेताहरुको अकर्मण्यताको कारण पनि देशको विकास ओझेलमा पर्दै आएको छ ।
राजनीतिक दल र तिनका नेताबीच सत्ताका लागि मनमुटाव र सत्ताकै मेलमिलाप जस्तो स्वार्थी खेल यस अवधिमा चलिरहेको छ । जुन मुलुकको लागि निकै घातक हो । यसले हाम्रो विकास र समृद्धिको चाहना कहिल्यै पनि पूरा हुन नसक्ने संकेत गर्छ । हालैको निर्वाचन परिणाम र नयाँ सरकार गठनबाट पनि मुलुकले स्थिरता पाउला त भन्नेमा अझै विश्वस्त हुने आधार छैन । हिजो एकअर्काको दुश्मन बनेका नेताहरु आज सत्ताका लागि मित्रता जोड्न तयार भएका छन् । हिजोका गल्तीलाई मनन गर्दै अहिलेको सरकार गठनमा देखिएको वाम गठबन्धनमा अन्य वाम दललाई पनि एकीकृत र सहभागी गराउने हो भन्ने पक्कै पनि मुलुकले केही स्थिरता पाउनेछ । देश बनाउने र बचाउनेबीच मेलमिलाप नै आजको आवश्यकता हो भन्ने चेत नेताहरुमा खुल्न जरुरी छ , नेताहरुलाई चेतना भया ! जनधारणा साप्ताहिकबाट
