काठमाडौँ- त्रिभुवन विमानस्थलबाट दुबईका लागि उडेको फ्लाई दुबईको जहाज चरा ठोकिएर केहीबेर असन्तुलित भएको र अहिले सुरक्षित अवस्थामा गन्तव्यतर्फ अघि बढेको अधिकारीहरुले जानकारी दिएका छन्।
काठमाडौँबाट दुबईका लागि १७५ जना यात्रु लिएर उडेको उक्त जहाजमा चरा ठोकिएपछि एक भागमा आगलागी भएर केहीबेर असन्तुलित भएको थियो।
in
पाइलटले आकस्मिक अवतरणका लागि काठमाडौँ विमानस्थलमा अनुमति मागे पनि पछि इन्जिन सुरक्षित रहेको जानकारी गराउँदै दुबईतर्फ नै उडेको जानकारी गराएका थिए।
फ्लाई दुबईका अधिकारीहरुले जहाज अहिले सुरक्षित अवस्थामा रहेको र दुबईको स्थानीय समयअनुसार १२:१४ मा अवतरण गर्ने तयारीमा रहेको जानकारी गराएका थिए।
जहाज आकस्मिक अवतरण गराउने तयारीका लागि काठमाडौँतर्फ आएका अन्तर्राष्ट्रिय तथा राष्ट्रिय उडानहरु आकाशमै होल्ड गरिएका थिए।
विमानस्थलमा सुरक्षाव्यवस्था मजबुत पार्नुका साथै आकस्मिक अवतरणका लागि सबै तयारी गरिएको थियो।
