काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले नेपाली कांग्रेसको सबैभन्दा ठूलो राजनीतिक शक्ति उसको लामो इतिहास भएको जनाएका छन्।
नेपाली कांग्रेसको १५औँ महाधिवेशन उद्घाटन समारोहलाई सम्बोधन गर्दै लामिछानेले कांग्रेसले नेपालको लोकतान्त्रिक आन्दोलनमा पुर्याएको योगदानको आफूले सधैँ सम्मान गर्ने जनाए। कांग्रेसको इतिहासबाट पाठ सिकेर अघि बढ्नुपर्ने उनको धारणा थियो।
‘नेपाली कांग्रेसको शक्ति इतिहास हो। कमजोर पनि इतिहास हो,’ उनले भने, ‘कांग्रेसको इतिहासबाट पाठ सिक्नैपर्छ। यसमा हामी पाठ सिकेर अगाडि बढ्नेछौँ।’
लामिछानेले कांग्रेसको विगतको योगदान र उपलब्धिसँगै उसका कमजोरीबाट पनि नयाँ पुस्ताले सिक्नुपर्ने जनाए। इतिहासलाई गौरव गर्ने विषयमा मात्रै सीमित नगरी आगामी राजनीतिक यात्राका लागि सिकाइका रूपमा लिनुपर्ने उनको धारणा थियो।
उनले आफू पनि कांग्रेसमा हुन सक्ने प्रसंग सुनाउँदै कांग्रेसले नयाँ पुस्तालाई समयमै नेतृत्व र अवसर दिएको भए आफू कांग्रेसमै हुन सक्ने संकेत गरे। दलहरूले नयाँ पुस्ताको आकांक्षा र परिवर्तनको चाहनालाई सम्बोधन गर्नुपर्ने उनले जनाए।
महाधिवेशनको मञ्चमा आफू सत्तापक्ष भए पनि एक्लो प्रतिपक्षीजस्तो देखिएको भन्दै लामिछानेले व्यंग्यात्मक शैलीमा भने, ‘आज यो मञ्चको एक्लो प्रतिपक्षी भएछु। सत्तापक्ष तर यो मञ्चको एक्लो प्रतिपक्ष। प्रायः एक्लो हुने बानी पनि छ मलाई।’
भाषण, नारा र घोषणापत्रमा मात्रै सीमित राजनीति अब पर्याप्त नहुने भन्दै लामिछानेले जनताले राजनीतिक दलको काम र परिणाम हेर्न थालेको बताए। आफूहरूले काम गर्न नसके निर्वाचनमार्फत जनताले निर्णय गर्ने भन्दै उनले जनमतको सम्मान गर्नुपर्ने जनाए।
राष्ट्रिय हितका विषयमा भने राजनीतिक दल र झन्डाको भिन्नता गौण हुने उनको भनाइ थियो।
‘पार्टीको कुरा होइन, मुलुक र देशको कुरा आउँछ त्यतिबेला पार्टी र झन्डा फरक हुँदैन,’ उनले भने।
सरकार कमजोर भएको चर्चा भइरहे पनि वर्तमान सरकार नढल्ने दाबी गर्दै लामिछानेले सरकार परिवर्तनको निर्णय राजनीतिक दलको दबाब वा चर्चाबाट नभई जनताको मतबाट हुने जनाए।
‘सरकार कमजोर भयो भन्ने पनि सुनिन्छ। यो सरकार ढल्दैन, नढलेपछि अरू ढल्छन्,’ उनले भने।
लोकतन्त्रको ठेक्का कुनै एउटा राजनीतिक दलले लिन नहुने भन्दै लामिछानेले लोकतन्त्र खतरामा परे जनताले त्यसको रक्षा गर्ने बताए। आफूहरूलाई हटाउने वा विस्थापित गर्ने अधिकार पनि निर्वाचनमार्फत जनतामै रहेको उनको भनाइ थियो।
‘लोकतन्त्रको ठेक्का नलिनुस्, लोकतन्त्र खतरामा परे जनताले जोगाउँछन्,’ उनले भने, ‘हामीलाई हटाउन, विस्थापन गर्न चुनावले मात्रै सक्छ।’
आफूहरूले काम गर्न नसके आगामी निर्वाचनमा जनताले आफूहरूलाई अस्वीकार गर्ने कुरा स्वीकार्य रहेको उनले जनाए।
‘हामीले काम गर्न सकेनौँ भने हामीलाई डाँडो कटाउनुस् भनेकै छौँ,’ उनले भने।
लामिछानेले बलिदान र संघर्षबाट प्राप्त लोकतन्त्रका मूल्य र मान्यतालाई कमजोर हुन नदिने प्रतिबद्धता व्यक्त गरे। लोकतन्त्रलाई कमजोर पार्ने कुनै प्रयास स्वीकार्य नहुने भन्दै उनले राजनीतिक परिवर्तनको रक्षा सबैको जिम्मेवारी भएको जनाए।
कांग्रेस सभापति गगनकुमार थापाको नेतृत्वमा पार्टी नयाँ चरणमा प्रवेश गरेको उल्लेख गर्दै लामिछानेले कांग्रेसले आफ्नो लामो इतिहासबाट सिक्दै नयाँ पुस्ताको चाहना र जनताको अपेक्षासँग जोडिएर अघि बढ्नुपर्ने जनाए।
