काठमाडौं । एसियन गेम्समा बंगलादेशविरुद्धको क्वाटरफाइनल खेल वर्षाका कारण रद्द भएपछि मलेसियाका क्रिकेटर विरानदीप सिंहले सामाजिक सञ्जालमार्फत निराशा व्यक्त गरेका छन् ।
टावल बाँधेको फोटो सार्वजनिक गर्दै विरानदीपले आफूहरू मैदान पुग्नसमेत नपाउँदै खेल रद्द भएको जनाएका छन् । उनले लेखेका छन्, ‘हाम्रो क्वाटरफाइनल खेल रद्द भएको जानकारी आउँदा हामी होटलमै थियौं, म टावलमै थिएँ । बंगलादेशविरुद्ध खेल्ने अर्को अवसरका लागि तीन वर्षदेखि पर्खिरहेको थिएँ, तर यसपटक त्यो अवसर पनि जुरेन । एसोसिएट क्रिकेट कठिन छ ।’
खेल हुने कोरोगी स्पोर्ट्स पार्कको क्रिकेट मैदान पूर्णरूपमा ढाकिएको पनि छैन । पिच र स्क्वायर मात्र ढाकिएको अवस्थामा छ भने आउटफिल्ड त्यतिकै छाडिँदा मैदानभरी पानी जमेको छ ।
यससँगै वरीयताकै आधारमा क्वाटरफाइनलमा स्थान बनाएका टोलीहरू भारत, पाकिस्तान, श्रीलंका र बंगलादेश नै सेमिफाइनल पुगेका छन् ।
नेपाल र अफगानिस्तान समूह ‘ए’ तथा मलेसिया र हङकङ समूह ‘बी’ बाट क्वाटरफाइनलमा पुगेका थिए । वर्षाका कारण क्वाटरफाइनलका खेलहरू प्रभावित भएपछि वरीयताले नै सेमिफाइनल पुग्ने टोलीको टुंगो लगाएको हो ।
