काठमाडौं । पछिल्ला चार दिनमा देशका विभिन्न स्थानमा भएको अविरल वर्षाका कारण देशभरका १८६ वटा वर्षा मापन केन्द्रमा १०० मिलिमिटरभन्दा बढी कुल वर्षा रेकर्ड भएको छ ।
सबैभन्दा धेरै वर्षा नवलपुर (पूर्वी नवलपरासी) को डेढगाउँमा ५४४.२ मिलिमिटर मापन भएको छ ।
नवलपुरको डेढगाउँपछि धेरै वर्षा कास्कीको पञ्चासेमा ५००.२ मिलिमिटर रेकर्ड भएको छ ।
यसैगरी म्याग्दीको दरबाङमा ३९७.४ मिलिमिटर, चितवनको माडी कल्याणपुरमा ३९६ मिलिमिटर, कपिलवस्तुको मैनारमा ३८८.६ मिलिमिटर, कपिलवस्तुको भगवानपुरमा ३६६.६ मिलिमिटर र नवलपुरको देउराली नवलपुरमा ३६५.६ मिलिमिटर वर्षा मापन भएको छ ।
विभागको विवरणअनुसार सोही अवधिमा २३३ वटा वर्षा मापन केन्द्रमा करिब १७५ मिलिमिटरसम्म वर्षा रेकर्ड भएको छ । १८६ वर्षा मापन केन्द्रमा १०० मिलिमिटरभन्दा बढी पानी परेको छ ।
हिमाली जिल्ला हुम्लाको सदरमुकाम सिमिकोटमा २४ घण्टामै रेकर्डब्रेक वर्षा भएको थियो ।
मौसम तथा जलवायु विज्ञान कार्यालय, सुर्खेतकी प्रमुख डा. इन्दिरा कडेलका अनुसार २०८३ असोज ९ गते बिहान ८:४५ बजेदेखि असोज १० गते बिहान ८:४५ बजेसम्मको अवधिमा सिमिकोटमा ११४.८ मिलिमिटर वर्षा मापन भएको हो ।
यो सन् १९७८ जुन १ देखि सन् २०२६ सेप्टेम्बर २६ सम्मको २४ घण्टा अवधिको सबैभन्दा उच्च वर्षा रेकर्ड हो । यसअघि १९ अक्टुबर २०२१ मा सिमिकोटमा २४ घण्टामा ११० मिलिमिटर वर्षा भएको थियो र त्यसैलाई उच्च रेकर्ड मानिएको थियो ।
बंगालको खाडीमा विकसित न्यूनचापीय प्रणालीको प्रभावका कारण गण्डकी र लुम्बिनी प्रदेशमा अत्यधिक वर्षा हुने पूर्वानुमान मौसमविदहरुले पहिल्यै सार्वजनिक गरेका थिए ।
चार जिल्लामा कम्तीमा २१ जनाको मृत्यु
लगातार वर्षाका कारण नेपालका विभिन्न जिल्लामा बाढी पहिरोले जनधनको क्षतिसमेत पुर्याएको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार असोज ८ गतेदेखि ११ गते साँझ ६ बजेसम्मको विवरण अनुसार देशका विभिन्न जिल्लामा कम्तीमा २१ जनाको मृत्यु भएको छ भने पाँच जना बेपत्ता र पाँच जना घाइते भएका छन् । ७४७ परिवार प्रत्यक्ष प्रभावित भएका छन् ।
बागलुङ, पर्वत, मनाङ, नवलपरासी पूर्व, चितवन, पाल्पा, धनुषालगायत जिल्ला र आसपासका क्षेत्रमा बढी प्रभावित भएका छन् ।
