काठमाडाैं । आजदेखि डेंगु संक्रमणको जोखिम न्यूनीकरण गर्ने उद्देश्यले सरकारले देशभर तीन महिने डेंगु सचेतना अभियान सञ्चालन गरेको छ।
साउन, भदौ र असोज महिनाभर सञ्चालन हुने अभियानमार्फत डेंगु रोगको रोकथाम, नियन्त्रण र जनचेतना अभिवृद्धिमा विशेष जोड दिइनेछ।
भूमि व्यवस्था, सहकारी, सङ्घीय मामिला तथा सामान्य प्रशासन मन्त्रालयले देशभरका सबै गाउँपालिका र नगरपालिकालाई अभियान प्रभावकारी रूपमा सञ्चालन गर्न निर्देशन दिँदै डेंगु नियन्त्रणसम्बन्धी विभिन्न सचेतनामूलक कार्यक्रम सञ्चालन गर्न आग्रह गरेको छ।
मन्त्रालयका अनुसार अभियान स्थानीय तहको नेतृत्वमा सम्बन्धित वडा कार्यालय, स्वास्थ्य संस्था, शैक्षिक संस्था, सामुदायिक संगठन तथा अन्य सरोकारवाला निकायसँग समन्वय र सहकार्य गरी सञ्चालन गरिनेछ। यसको मुख्य उद्देश्य डेंगु सार्ने लामखुट्टेको प्रजननस्थल नष्ट गर्नुका साथै समुदायमा रोगबारे सचेतना अभिवृद्धि गर्नु हो।
अभियानअन्तर्गत प्रत्येक शुक्रबार ‘हरेक शुक्रबार, सफा शुक्रबार’ कार्यक्रम सञ्चालन गरिनेछ। यस क्रममा सरकारी कार्यालय, सार्वजनिक संस्था, विद्यालय तथा सामुदायिक क्षेत्रहरूमा लामखुट्टेको प्रजननस्थल पहिचान गरी नष्ट गर्ने अभियान सञ्चालन हुनेछ।
त्यसैगरी स्थानीय तहहरूले कम्तीमा हप्तामा एक दिन समुदायको सक्रिय सहभागितामा ‘लामखुट्टेको प्रजननस्थल खोज तथा नष्ट अभियान’ सञ्चालन गर्नुपर्नेछ। साथै डेंगु नियन्त्रणका लागि विभिन्न निकायबीच समन्वय सुदृढ गर्दै अटो वर्कसप, ग्यारेज, कवाडी सामग्री भण्डारण स्थल, निर्माणाधीन भवन तथा पानी जम्न सक्ने अन्य स्थानहरूको नियमित अनुगमन गरी पानीको उचित निकास र व्यवस्थापन गर्न पनि मन्त्रालयले आग्रह गरेको छ।
