काठमाडौं । फिफा विश्वकप २०२६ अन्तर्गत समूह ‘जी’ को महत्वपूर्ण खेलमा बेल्जियम र इरानले गोलरहित बराबरी खेल्दै अंक बाँडेका छन्। लस एन्जलसस्थित सोफी स्टेडियममा सोमबार बिहान सम्पन्न प्रतिस्पर्धात्मक खेलमा १० खेलाडीमा सीमित बनेको बेल्जियमलाई इरानले रोचक बराबरीमा रोक्दै समूहको समीकरण थप खुला बनाएको हो।
खेलअघि जितको प्रमुख दाबेदार मानिएको बेल्जियमले बल नियन्त्रण र आक्रमणमा प्रभुत्व जमाए पनि इरानका अनुभवी गोलरक्षक अलिरेजा बेइरानभान्डको उत्कृष्ट प्रदर्शनका कारण गोल गर्न सकेन। उनले खेलभरि अनेक महत्वपूर्ण बचाउ गर्दै बेल्जियमका आक्रमणलाई विफल बनाएका थिए।
पहिलो हाफमा इरानका कप्तान मेहदी टारेमीले बललाई जाली चुमाएपछि इरानी समर्थक उत्साहित बनेका थिए। तर भिडियो सहायक रेफ्री (VAR) को परीक्षणपछि उक्त गोल अफसाइड ठहरिएर रद्द गरियो।
दोस्रो हाफमा बेल्जियमले लगातार दबाब सिर्जना गर्यो। विशेषगरी म्याक्सिम डे कुइपरको नजिकबाट आएको प्रहार बेइरानभान्डले अविश्वसनीय रूपमा बचाउँदै इरानलाई सम्भावित गोलबाट जोगाए। उक्त बचाउलाई प्रतियोगिताकै उत्कृष्ट बचाउमध्ये एकका रूपमा चर्चा गरिएको छ।
खेलको ६६ औँ मिनेटमा बेल्जियमका डिफेन्डर नाथन न्गोयले टारेमीलाई रोक्ने क्रममा फाउल गरेपछि सिधै रातो कार्ड पाएर मैदान छाड्नुपरेको थियो। त्यसपछि बेल्जियम बाँकी समय १० खेलाडीमा सीमित रह्यो।
रातो कार्डपछि पनि बेल्जियमले केही राम्रा अवसर सिर्जना गरेको थियो भने इरानले पनि प्रतिआक्रमणमार्फत गोल गर्ने प्रयास गरेको थियो। तर दुवै टोलीले अन्तिम क्षणसम्म गोल निकाल्न नसक्दा खेल ०–० को बराबरीमा समाप्त भयो।
यस नतिजासँगै समूह ‘जी’ को नकआउट चरणको प्रतिस्पर्धा थप रोमाञ्चक बनेको छ। बेल्जियमले अब आफ्नो अन्तिम समूह खेलमा न्यूजिल्यान्डको सामना गर्नेछ भने इरानले इजिप्टसँग प्रतिस्पर्धा गर्नेछ। दुवै टोलीका लागि आगामी खेलहरू अन्तिम १६ मा स्थान सुरक्षित गर्ने दृष्टिले निर्णायक रहनेछन्।
इरानका गोलरक्षक बेइरानभान्ड खेलका नायक बने भने बेल्जियमले अवसरको सदुपयोग गर्न नसक्दा महत्वपूर्ण दुई अंक गुमाएको विश्लेषण गरिएको छ।
