काठमाडौं । तराई–मधेशबाट नेपाली औपनिवेशिक शासनको अन्त्य मागसहित ‘मधेश मुक्ति अभियान’ घोषणा भएको छ ।
रौतहट जिल्लाको गढीमाई नगरपालिका–३ मा बिहीबार आयोजित एक कार्यक्रममा हजारौंको संख्यामा स्वाधिन मधेश जनअभियानका संयोजक प्रोफेसर कैलाश महतोको नेतृत्वम सो अभियान घोषणा भएको हो ।
कार्यक्रमलाई सम्बोधन गर्दै प्रोफेसर महतोले चुनावताका प्रधानमन्त्री बालेन्द्र साहले गरेका प्रतिबद्धताहरु पूरा नगरे स्वतन्त्र मधेशको लागि पनि संघर्ष हुन सक्ने चेतावनी दिएका छन् । उनले भने, ‘अहिले हामी देशभित्रै स्वतन्त्रता मागिरहेका छौं, हाम्रा मागहरुलाई बेवास्ता गरिए छुट्टै राष्ट्रका लागि पनि आन्दोलन हुनसक्छ ।’
कार्यक्रममा सहभागीहरुले आजादीको नारा लगाएका थिए । ‘हामीलाई आजादी चाहियो, मधेशी मुक्ति अभियान जिन्दावाद’ जस्ता नारा पनि लगाइएको थियो ।
घोषणासभाबाट ‘तराई मधेशबाट नेपाली औपनिवेशिक शासनको अन्त्य होस्’, ‘तराई मधेशमा मधेशी सेना, मधेशी प्रहरी, मधेशी प्रशासक र मधेशीको शासन होस्।’, ‘तराई मधेशको साधन श्रोतमा मधेशीको अधिकार स्थापित हो’, लगायतका मागहरु सार्वजनिक गरिएको छ ।
यस्तै, ‘तराई–मधेशमा भएको बाहिरी अप्रवासन खाली गरियोस्’, ‘नेपाल सरकारले तराई मधेशबाट उठाउँदै आएका सबै प्रकारका कर, राजस्व र भन्सार यही क्षेत्रमा प्रयोग होस्’ मधेशी मूलका नागरिकमाथि हुँदै आएको नश्लीय विभेद, सामाजिक असमानता र राजनीतिक उपेक्षाको पूर्ण अन्त्य होस्’ ‘आत्मनिर्णयको अधिकार स्थापित होस्’ मागहरु रहेका छन् ।
अभियानको संयोजकमा कैलाश महतो रहेका छन् भने विपिन अधिकारी, गिता महरा, मनोज यादव, वैधनाथ महतो, लक्ष्मण साह लगायतका अभियानमा छन् । कार्यक्रमको उद्घोषण शिवजी यादवले गरेका थिए ।
