एजेन्सी । जापानको टोयोटा मोटरले शुक्रबार आफ्नो चौथो त्रैमासिक सञ्चालन नाफामा ४९ प्रतिशतको गिरावट आएको जानकारी दिएको छ ।
अमेरिकी भन्सार शुल्क र चिनियाँ सवारी उत्पादकहरूबाट बढेको तीव्र प्रतिस्पर्धाका कारण नाफामा दबाब परेको हो । यसले गर्दा यो नतिजा विश्लेषकहरूको अनुमानभन्दा कम रहेको छ ।
एलएसईजीको औसत अनुमानको तुलनामा टोयोटाको नतिजा यस्तो देखिएको छः
राजस्वः १२.६ ट्रिलियन येन (अपेक्षा अनुसार नै)
सञ्चालन नाफाः ५६९.४ बिलियन येन (८१३.२८ बिलियन येनको अपेक्षा गरिएकोमा निकै कम)
बिक्रीको आधारमा विश्वको सबैभन्दा ठूलो यस सवारी उत्पादकको राजस्व मार्चमा समाप्त भएको चौथो त्रैमासिकमा वार्षिक रूपमा १.८९ प्रतिशतले बढेको छ जुन अपेक्षा अनुसार नै हो । तर, अमेरिकी भन्सार शुल्कको निरन्तर दबाबका कारण सञ्चालन नाफा भने लगातार चौथोपटक वार्षिक रूपमा घटेको छ ।
कम्पनीको खुद नाफा भने अघिल्लो वर्षको ६६४.६ बिलियन येनबाट बढेर ८१७.२ बिलियन येन पुगेको छ । यद्यपि, टोयोटाको एकीकृत सवारी बिक्री भने अघिल्लो वर्षको सोही अवधिको २.३६ मिलियन युनिटबाट घटेर २.२९ मिलियन युनिटमा झरेको छ ।
टोयोटाले मार्च २०२७ मा समाप्त हुने आर्थिक वर्षका लागि आफ्नो सञ्चालन आम्दानीको प्रक्षेपण २० प्रतिशतभन्दा बढीले घटाएर ३ ट्रिलियन येनमा सीमित गरेको छ । तर, बिक्री राजस्वको प्रक्षेपण भने ०.६ प्रतिशतले बढाएको छ ।
‘हामीले हालै मानव संसाधन र भविष्यमुखी लगानीमा भएको वृद्धि र अमेरिकी भन्सार शुल्कको प्रभावका कारण हाम्रो ब्रेकइभन भोल्युम (नाफा–घाटा बराबर हुने विन्दु) मा उल्लेखनीय वृद्धि भएको देखेका छौं,’ कम्पनीले आफ्नो आम्दानी वक्तव्यमा भनेको छ ।
शुक्रबार आयोजित मिडिया ब्रिफिङमा कम्पनीले हालको मुद्रा उतारचढावका कारण सामान्यतया प्रयोग गरिने मासिक औसत विनिमय दरको सट्टा ६ महिनाको औसत दर अपनाएको बताएको छ । टोयोटाले यस आर्थिक वर्षका लागि औसत विनिमय दर १ अमेरिकी डलर बराबर १५० येन तय गरेको छ ।
जापानी येन कमजोर हुँदा टोयोटा जस्ता निर्यातकहरूको उत्पादन विदेशी ग्राहकका लागि सस्तो हुने र विदेशी नाफाको मूल्य बढ्ने फाइदा हुन्छ । तर, कम्पनीको अनुसन्धान र विकास खर्च भने प्रमाणीकरण सम्बन्धी समस्या र उत्पादन क्षमताको सीमितताका कारण कीर्तिमान स्तरमा पुगेको छ । कम्पनीले लागत कटौती जारी राख्ने बताए पनि पश्चिम एसियाको द्वन्द्व र मुद्रास्फीतिका कारण खर्च अझै बढ्ने अपेक्षा गरेको छ ।
प्राइस टार्गेट रिसर्चको मे ५ को प्रतिवेदन अनुसार, सन् २०१६ देखि २०२५ को अवधिमा टोयोटाको सम्पत्तिको उत्पादकत्वमा गिरावट आएको छ । टोयोटाले हाल चिनियाँ बजारमा सुस्त बिक्री, गाडीहरूको फिर्ता, इलेक्ट्रिक सवारीसाधनको क्षेत्रमा बढेको प्रतिस्पर्धा र ट्रम्पसँग सम्बन्धित भन्सार शुल्क जस्ता धेरै चुनौतीहरूको सामना गरिरहेको छ ।
पश्चिम एसियाको द्वन्द्वका कारण इन्धनको मूल्यमा परेको दबाब र महँगीका कारण पहिलो त्रैमासिकमा अमेरिकामा पनि टोयोटाको बिक्री कमजोर देखिएको छ । कम्पनीले भन्सार शुल्क र अन्य नियामक परिवर्तनहरूका बीच उत्पादन योजनाहरू मिलाउने प्रयास गरिरहेको छ ।
यसैबीच, कम्पनीले आगामी पाँच वर्षमा अमेरिकामा १० अर्ब डलरसम्म लगानी गर्ने योजना अन्तर्गत त्यहाँका दुईवटा प्लान्टहरूमा कुल १ अर्ब डलर खर्च गर्ने घोषणा मार्चमा गरेको थियो ।
टोयोटाले चीन, युरोप र उत्तर अमेरिकामा ब्याट्री–इलेक्ट्रिक सवारी साधनको क्षेत्रमा वृद्धि हुने अपेक्षा राखेको छ र ती क्षेत्रहरूमा व्यवसाय विस्तार गर्ने योजना बनाएको छ ।
शुक्रबार टोकियो बजारमा टोयोटाको सेयर मूल्य २.१८ प्रतिशतले घटेर बन्द भएको छ ।
