बुटवल । लुम्बिनी विकास कोषको नवनियुक्त उपाध्यक्ष आनी छोइङ डोल्माको नियुक्ति बदरको माग गर्दै आन्दोलन गरिरहेको लुम्बिनी बचाउ महाअभियानका संयोजक अकरम खान सहित दुईजना पक्राउ परेका छन् ।
प्रहरीले मध्यराति लुम्बिनी पर्साचोकस्थित घरमा सुतिरहेको अवस्थामा ६१ वर्षीय संयोजक खान र लुम्बिनी सांस्कृतिक नगरपालिका ९ का ३३ वर्षीय वाविउद्दिन मुसलमानलाई पक्राउ गरेर लगेको अभियानका सहसंयोजक रामविकास चौधरीले जानकारी दिए ।
जिल्ला प्रहरी कार्यालय रुपन्देहीले दुबैजनाको पक्राउको पुष्टी गर्दै सार्वजनिक स्थानमा ‘उच्छृंखल गतिविधि’ गरेको आरोपमा अनुसन्धानका लागि पक्राउ गरेर जिल्ला प्रहरी कार्यालय भैरहवामा राखिएको जनाएको छ ।
कोषको उपाध्यक्षमा आवेदन नै नदिएकी आनी छोइङलाई नियुक्ति दिइएको भन्दै लुम्बिनी बचाउ महाअभियानसँगै कपिलवस्तु तिलौराकोट संघर्ष समिति, लुम्बिनीवासी प्रदेश सांसद र पूर्व मन्त्री चन्द्रकेश गुप्ता, वरिष्ठ अधिवक्ता दिनेश त्रिपाठी, राष्ट्रिय जेनजी नागरिक अभियान लगायतले विरोध गर्दै आएका छन् ।
उनीहरुले आनीमाथि वंशजको नागरिकता प्राप्ति र उनले हङकङबाट प्राप्त गरेको भनिएको करोडौं रकमको वैधता र पारदर्शितामाथि पनि प्रश्न उठाएका छन् । आनीमाथि उठेका विषयमा निष्पक्ष छानबिन गरेर निर्दोष सावित भए मात्र नियुक्ति स्वीकार्य हुने उनीहरुको माग छ ।
