काठमाडौं । राष्ट्रिय मानव अधिकार आयोगले आत्महत्या रोकथाम तथा मानव अधिकारको सुनिश्चितता गर्न आग्रह गरेको छ ।
प्रत्येक वर्ष १० सेप्टेम्बरका दिन विश्व आत्महत्या रोकथाम दिवस मनाइन्छ । यस अवसरमा प्रेस विज्ञप्ति निकालेर आयोगले यस्तो आग्रह गरेको हो । आत्महत्या रोकथामका लागि विश्वव्यापी रूपमा जनचेतना अभिवृद्धि गर्ने उद्देश्यले यो दिवस मनाउने गरिएको हो ।
सन् २०२४ देखि २०२६ सालसम्मका लागि अर्थात् आत्महत्याबारेको कथ्य/दृष्टिकोण परिवर्तन गर्ने विषयवस्तु तय गरिएको छ ।आयोगका अनुसार नेपालमा प्रत्येक वर्ष हजारौँ व्यक्तिले आत्महत्याका कारण जीवन गुमाउनुपरेको अवस्था छ ।
नेपाल प्रहरीका अनुसार आर्थिक वर्ष २०८१/८२ मा आत्महत्यासम्बन्धी ६ हजार ८५२ घटनादर्ता भएका छन् भने आर्थिक वर्ष २०८०/८१ मा ७ हजार २२१ जनाको आत्महत्याबाट मृत्यु भएको तथ्यांक छ ।
आयोगका अनुसार मानसिक तनाव, चिन्ता तथा निराशा, घरेलु हिंसा तथा लैंगिक हिंसा, दीर्घकालिन मानसिक स्वास्थ्य सम्बन्धी समस्या, आर्थिक समस्या, गरीबि तथा बेरोजगारी लगायतका कारण नेपालमा आत्महत्याका घटनाहरु भइरहेको विभिन्न अध्ययनबाट देखिन्छ । आत्महत्या केवल मानसिक स्वास्थ्यको विषय नभईजीवन, मर्यादा, स्वास्थ्य, सुरक्षा तथा सम्मानपूर्वक बाँच्न पाउने अधिकारसँग सम्बन्धित गम्भीर मानव अधिकारको विषय हो ।
यस्ताे छ विज्ञप्ति :
