कीर्तिपुर । नेपाल कला-संस्कृति उत्थान समाजको आयोजनामा चर्चित गायक सतीश महर्जनको एकल सांगितिक साँझ ११४६ “सतीसया सः – संगीतया जः ” सोलो लाईभ कन्सर्टको आयोजना गर्न लागेकाे छ ।
यहि आउँदो भाद्र ६ गते शनिबार दिउँसो २:३० बजेदेखि ६ बजेसम्म कीर्तिपुर सिनेफ्लेक्समा गायक सतीश महर्जनले नेपाल भाषा तथा नेपाली भाषाकाे सांगितिक क्षेत्रमा दिनुभएको योगदानको कदर गर्दै उहाँको एकल साँझ कार्यक्रम गर्न लागेकाे अायाेजकले जानकारी गराउनु भयाे । यस समाजले गायक सतीश महर्जनको सांगितिक एकल साँझसंगै उहाँलाई नगद रु. ५० हजार सान्त्वना रकमका साथ सम्मान गर्ने कार्यक्रम समेत रहेकाे छ ।
साे एकल साँझ सांगितिक कार्यकम गायक सतीश महर्जनले आफ्नो सांगितिक यात्रामा विगतदेखि वर्तमानसम्मका विभिन्न आकर्षक गीतहरु प्रस्तुत गरिने छ । कार्यक्रममा सतीश महर्जनले नेपालभाषा र नेपाली भाषाका गरी आफ्ना करिब २० वटा गीतहरु प्रस्तुत गर्नु हुनेछ र विभिन्न चर्चित देखि नव प्रतिभा गायिकाहरुसंग लाईभ म्यूजिकल ब्याण्डसंगै युगल गीत पनि गाउनु हुनेछ ।
यसका अलावा साथै कन्सर्ट हुनुभन्दा अगाडि ‘सतीशया सः – संगीतया जः’ सतीश महर्जन सुखः ? नामक सतीशको सानो जीवनी भिडियोमार्फत् प्रस्तुत गरिने छ ।
संस्थाकाे परिचयः
‘नव-प्रतिभालाई प्रोत्साहन, अग्रजलाई सम्मान हाम्रो कला -संस्कृति, राष्ट्रको मौलिक पहिचान’ नाराका साथ वि.सं. २०८० सालमा बिल्कुलै नाफारहित सामाजिक संस्था नेपाल कला संस्कृति उत्थान समाज कलाकारिता, चित्रकारिता, खेलकुद, साहित्य संगीत इत्यादी क्षेत्रमा समर्पित भई त्यो क्षेत्रका संवाहकहरुलाई सम्मानका साथ उहाँहरुको प्रतिभा उजागर गर्न स्थापित संस्थाको रुपमा चिनिन्छ ।
यस समाजले हालसम्म चर्चित संगीतकर्मी गोविन्द ह्यूमतको एकल साँझ, कीर्तिपुर संगीत महोत्सव, रसना महर्जन एकल साँझ, लोककवि राजभाई जकःमि अभिनन्दन, योगेश वैद्य स्मरण कार्यक्रम, पुस्तक प्रकाशन इत्यादी कार्य सफलताका साथ गरिसकेको छ । हाल नयाँ नौलो सोंचका कार्यक्रमहरु गर्दै आइरहेको सामाजिक संस्थाको रुपमा लिन सकिन्छ यस नेपाल कला – संस्कृति उत्थान समाज ।
यस नेपाल कला-संस्कृति समाजमा विजयलाल डंगोल संस्थापक अध्यक्ष हुनुहुन्छ । यस्तै उपाध्यक्षमा रामकृष्ण महर्जन किरण, सचिवमा ललेन्द्र शाक्य, कोषाध्यक्षमा शर्मिला महर्जन तथा संस्थापक सदस्यहरुमा नवीन जोशी, गोविन्द ह्यूमत, कृष्णदेवी महर्जन, प्रवेश महर्जन तथा सदीक्षा डंगोल हुनुहुन्छ ।
