काठमाडाैं । नेपाली कांग्रेसले विपद् प्रभावित क्षेत्रमा उद्धार, राहत तथा पुनःस्थापनाका काममा तत्काल खटिन आफ्ना जनप्रतिनिधि र पार्टीका सदस्यलाई निर्देशन दिएको छ।
सभापति गगनकुमार थापाको सभापतित्वमा पार्टी केन्द्रीय कार्यालय, बीपी स्मृति भवन, बीपी नगर, ललितपुरमा जारी केन्द्रीय कार्यसमिति बैठकले विपद्का घटनाबाट प्रभावित नागरिकको उद्धार तथा राहतलाई प्राथमिकता दिन निर्देशन दिएको हो।
बैठकले जाजरकोटको भेरी नगरपालिका–२ रिसाङमा अविरल वर्षापछि आएको पहिरोमा परी ज्यान गुमाउनेहरूप्रति श्रद्धाञ्जली व्यक्त गर्दै मृतकका परिवारप्रति समवेदना प्रकट गरेको छ। घाइतेको तत्काल उचित उपचारको व्यवस्था मिलाउन सरकारसँग माग गर्दै घटनाका कारण घरबारविहीन तथा थप पहिरोको जोखिममा परेर विस्थापित भएका ७० भन्दा बढी परिवारको तत्काल उद्धार, राहत र पुनःस्थापना गर्न पनि आग्रह गरेको छ।
त्यस्तै, कालिकोटलगायत पहाडी जिल्लामा पहिरोका कारण विस्थापित नागरिकलाई सुरक्षित स्थानमा पुनःस्थापना गरी आवश्यक राहतको व्यवस्था गर्न सरकारको ध्यानाकर्षण गराइएको छ।
कांग्रेसले आफ्नो नेतृत्वमा रहेका प्रदेश तथा स्थानीय सरकारलाई समेत विपद्का घटनामा उद्धार, राहत र पुनःस्थापनाका कामलाई प्रभावकारी बनाउन निर्देशन दिइसकेको जनाएको छ।
केन्द्रीय कार्यसमिति बैठकमा आज १२ जनाले धारणा राखेका छन्। छलफल जारी रहेकाले बैठक भदौ १ गते सोमबार दिउँसो २ बजे पार्टी केन्द्रीय कार्यालयमा पुनः बस्ने कांग्रेसले जनाएको छ।
