काठमाडौं । आस्था मिडियाका अध्यक्ष तथा जनआस्था साप्ताहिकका सम्पादक किशोर श्रेष्ठलाई थुनामुक्त गर्न माग गर्दै दायर गरिएको बन्दी प्रत्यक्षीकरण रिटमा भएको सुनुवाइपछि उनको घर र कार्यालयबाट बरामद सबै सञ्चारसामाग्रीसहित श्रेष्ठलाई सोमबार अदालतमा उपस्थित गराउन आदेश भएको छ ।
सर्वोच्च अदालतका न्यायाधीश बालकृष्ण ढकालको इजलासले श्रेष्ठकी पत्नी सरस्वती श्रेष्ठले बिनाआधार र कारण पक्राउ गरिएको भन्दै थुनामुक्त गर्न माग गरेको रिटमा उक्त आदेश भएको छ । अस्ति राति घरबाट पक्राउ परेका श्रेष्ठलाई हिजो जिल्ला अदालत काठमाडौंले तीन दिनको म्याद थप गरेको थियो ।
उनको घरमा हिजो राति पुनः प्रहरीले खानतलासी गरेर सिसिटिभी रेकर्डर लगेको छ । कार्यालयबाट छ थान कम्प्युटर सिपीयु र एउटा मनिटर, एउटा मोबाइल लगेको छ भने घरबाट बालबालिकाको ल्यापटप मोबाइल अस्ति राति लगेको हो ।
