काठमाडाैं । भौतिक पूर्वाधार विकास मन्त्री सुनील लम्सालले आज नागढुंगा सुरुङ मार्गको औपचारिक रूपमा उद्घाटन गर्ने कार्यक्रम रहेकाे छ । काठमाडाैं भित्रने र बाहिरिने यातायातलाई सहज बनाउने यस सुरुङ मार्गको सञ्चालन आजैदेखि आधिकारिक रूपमा सुरु हुने भएको छ।
यो सुरुङ मार्ग निर्माणको काम नेपालकै पहिलो अत्याधुनिक सुरुङ मार्ग आयोजनाका रूपमा २०७६ कात्तिक ४ गते शिलान्यास गरी सुरु गरिएको थियो। लामो समयको तयारी र निर्माण चरण पार गर्दै अन्ततः यो परियोजना आजबाट सञ्चालनमा आउन लागेको हो।
सुरुङ मार्ग प्रयोग गरेवापत विभिन्न प्रकारका सवारी साधनका लागि शुल्क निर्धारण गरिएको छ। जसअनुसार कार, भ्यान, पिकअप, ट्रयाक्टर, माइक्रोबस र अन्य हलुका सवारीले काठमाडौँ प्रवेश गर्दा ६५ रुपैयाँ र बाहिरिँदा ६० रुपैयाँ शुल्क तिर्नुपर्नेछ। त्यस्तै, मिनीबस र मिनी ट्रिपर वा ट्रकका लागि काठमाडौं प्रवेश गर्दा ११५ रुपैयाँ र बाहिरिँदा ८० रुपैयाँ दस्तुर तोकिएको छ।
यसैगरी, बस र सिंगल रियर एक्सल भएका ट्रकको हकमा काठमाडौं प्रवेश गर्दा २६० रुपैयाँ तथा बाहिरिँदा २०० रुपैयाँ शुल्क लाग्नेछ भने मल्टी एक्सल ट्रक, अन्य ठूला सवारी साधन र भारी उपकरणका लागि काठमाडौं प्रवेशमा ६०० रुपैयाँ र बाहिरिँदा २५० रुपैयाँ शुल्क निर्धारण गरिएको छ।
तर, नागढुंगा सुरुङ मार्ग सञ्चालन तथा मर्मत इकाइकी जिज्ञाषा अधिकारीका अनुसार सुरक्षा सतर्कताका कारण दुई पाङ्ग्रे सवारी साधन, तरल र ग्यास इन्धन बोकेका सवारी, पशुपंक्षी बोक्ने सवारी तथा बम र बारुद ओसारपसार गर्ने सवारी साधनहरूलाई भने यस सुरुङ मार्ग प्रयोग गर्न पूर्ण रूपमा रोक लगाइएको छ।
