काठमाडौं । राष्ट्रिय स्वतन्त्र पार्टीका सभापति रवि लामिछानेले सञ्चारगृहका गेटसामु गाडी तेर्स्याइएको विषयमा छानबिन र अनुसन्धान हुनुपर्ने जनाएका छन् ।
मंगलबार प्रतिनिधिसभाको बैठकमा भाग लिएर बाहिरिने क्रममा उनले सञ्चारकर्मीसँग कुरा गर्दै यस्तो जवाफ दिएका हुन् ।
‘तत्काललाई छोडियो कि समायो कि के मुद्दा लगाइयो, त्यो बेग्लै कुरा हो । यो जुन प्रवृत्ति भयो, जुन देखियो । त्यो अस्वाभाविक भएकाले पार्टीले विज्ञप्तिमार्फत् भनिसकेको छ । पार्टी यसमा अडिग छ’, उनले भने।
सभापति लामिछानेले रास्वपाले आफ्ना सांसदहरूलाई ७२ घण्टाभित्र कारबाही गरेको उदाहरण दिँदै थपे, ‘किन कारबाही नहुने, जो भए पनि हुन्छ ।’
प्रधानमन्त्री वालेन्द्र शाहसँग सोमबार भएको भेटवार्ताबारे पनि उनले केही कुरा खुलाए । उनले सुकुम्वासी समस्या समाधानमा प्रभावकारी कदम चाल्न आफूले भनेको जनाए ।
‘विशेषगरी सुकुमवासी समस्या समाधान गर्न जे गर्नुपर्थ्यो, त्यसलाई प्रभावकारी बनाउनुपर्यो । आमनागरिकले दुःख पाउनुभएन । त्यसको व्यवस्थापनको विषयमा कुरा गर्यौँ’, उनले भने ।
आफ्नो निवास बूढानीलकण्ठमा भएको भेटवार्तामा राष्ट्रिय राजनीति, र देशको भोलिको परिस्थितिबारे पनि छलफल भएको बताए । उनले परिणाममुखी छलफल भएको जवाफ दिए पनि विस्तृतमा केही खुलाएनन् ।
