काठमाडौं । नेपाल क्रिकेट संघ (क्यान)ले आयोजना गर्ने नेपाल प्रिमियर लिग (एनपीएल)को तेस्रो संस्करणका लागि हुने खेलाडी अक्सनको सम्पूर्ण तयारी पूरा भएको छ ।
क्यानका अनुसार अक्सनका लागि प्रारम्भिक रूपमा नाम दर्ता गराएका ३४७ खेलाडीमध्ये अन्तिम छनोटमा १५५ जना खेलाडी परेका छन् । यही सूचीबाट विभिन्न फ्रेन्चाइज टोलीहरूले अक्सनमार्फत ५२ जना खेलाडीलाई आफ्नो टोलीमा आबद्ध गर्नेछन् ।
अन्तिम सूचीमा समावेश खेलाडीलाई तीन श्रेणीमा विभाजन गरिएको छ । जसअनुसार ए क्याटेगोरीमा ५ जना, बी क्याटेगोरीमा २७ जना र सी क्याटेगोरीमा १२३ जना खेलाडी रहेका छन् ।
यसै संस्करणदेखि एनपीएलमा नयाँ व्यवस्था पनि लागू गरिएको क्यानले जनाएको छ। अब प्रत्येक फ्रेन्चाइज टोलीमा मार्की र ट्यालेन्ट हन्टमार्फत छनोट हुने खेलाडीसहित कुल १४ जना नेपाली खेलाडी रहनेछन् ।
यस व्यवस्थाले थप नेपाली क्रिकेटरलाई व्यावसायिक प्रतियोगितामा अवसर सिर्जना गर्ने विश्वास क्यानको छ । क्यानका सचिव पारस खड्काद्वारा जारी विज्ञप्तिअनुसार खेलाडी अक्सन कार्यक्रम सोमबार काठमाडौंमा आयोजना हुनेछ।
