फिफा विश्वकपअन्तर्गत अन्तिम ३२ को खेलमा इक्वेडरलाई २–० ले पराजित गर्दै ऐतिहासिक सफलता हात पारेको मेक्सिकोको विजय उत्सव दुःखद घटनामा परिणत भएको छ। उत्सव मनाउन सडकमा ओर्लिएका समर्थकहरूको अत्यधिक भीडमा निस्सासिँदा तीन जनाको मृत्यु भएको बीबीसीले जनाएको छ।
रिपोर्टअनुसार, ज्यान गुमाउनेमा १९ वर्षीया एक युवती, ४८ वर्षीया एक महिला र ४४ वर्षीय एक पुरुष रहेका छन्। मेक्सिको सिटीको स्वास्थ्य प्राधिकरणका अनुसार अत्यधिक भीडका कारण उनीहरूको सफोकेसन (निस्सास्सिएर) मृत्यु भएको हो।
१९८६ पछि पहिलो पटक विश्वकपको नकआउट चरणमा पुगेको खुसी मनाउन राजधानी मेक्सिको सिटीका सडकमा १० लाखभन्दा बढी समर्थक जम्मा भएका थिए। विशेषगरी एन्जेल अफ इन्डिपेन्डेन्स स्मारक आसपासको क्षेत्रमा विशाल भीड लागेको स्थानीय सरकारले जनाएको छ।
स्वास्थ्य प्राधिकरणका अनुसार पासेओ दे ला रिफोर्माका विभिन्न स्थानबाट बेहोस अवस्थामा फेला परेका तीनै जनालाई उद्धारकर्मीले प्राथमिक उपचार तथा सीपीआर दिएपछि अस्पताल पुर्याएका थिए। तर चिकित्सकले उनीहरूलाई मृत घोषणा गरेका थिए। त्यसपछि परिवारका सदस्यले मृतकहरूको पहिचान पुष्टि गरेका थिए।
मेक्सिको सिटीकी मेयर क्लारा ब्रुगाडाले घटनाप्रति गहिरो दुःख व्यक्त गर्दै मृतकका परिवारलाई आवश्यक सहयोग उपलब्ध गराइने बताएकी छन्। उनले भविष्यमा उत्सव मनाउँदा जिम्मेवारी, सावधानी र एकअर्काप्रति संवेदनशील हुन समर्थकहरूलाई आग्रह पनि गरेकी छन्।
मेक्सिकोको जितपछि इस्टाडियो आजतेका र राजधानीका विभिन्न स्थानमा रातभर आतिशबाजीसहित उल्लासपूर्ण उत्सव मनाइएको थियो। तर त्यही क्रममा धेरै व्यक्ति बिरामी र घाइते भएपछि उद्धार तथा स्वास्थ्य टोलीलाई निरन्तर परिचालन गर्नुपरेको थियो।
खेल सुरु हुनुअघि नै मेयर ब्रुगाडाले एन्जेल अफ इन्डिपेन्डेन्स क्षेत्रमा अत्यधिक भीड भइसकेको भन्दै त्यहाँ खेल हेर्न नजान समर्थकहरूलाई आग्रह गरेकी थिइन्।
करिब २ करोडभन्दा बढी जनसंख्या रहेको महानगरीय क्षेत्र मेक्सिको सिटी विश्वका उच्च जनघनत्व भएका सहरमध्ये एक मानिन्छ। यसपटक विश्वकपको ऐतिहासिक जितको उल्लास अत्यधिक भीडका कारण दुःखद घटनामा परिणत भएको छ।
अब मेक्सिकोले विश्वकपको अन्तिम १६ मा डिआर कंगोलाइ इंग्ल्यान्डले १ का विरूद्व २ गाेलले पराजित गरि क्वाटरफाइनल प्रवेश गरेकाे छ ।
