काठमाडौं । सेयर बजार ६ महिनाकै तल्लो बिन्दुमा झरेको छ । मंगलबार लगातार सातौं कारोबार दिन घटेसँगै नेप्से परिसूचक ६ महिनाकै तल्लो बिन्दुमा झरेको हो ।
आज नेप्से परिसूचक २४.६३ अंक घटेको छ । यो अंकको कमीपछि २६०८ अंकमा कायम भएको छ, यो अंक गत पुस ९ यताकै न्यून हो । पुस ९ गते नेप्से २५८५ अंकमा थियो ।
आज बजार दिनभरजसो रातो अंकमा रह्यो । कारोबार रकम भने बढेको छ । अघिल्लो दिन २ अर्ब ६७ करोडको कारोबार भएकोमा आज ३ अर्ब २५ करोडको भयो ।
हालै सूचीकृत स्नो रिभर्सको मूल्य १५ प्रतिशत बढेको छ । त्यस्तै कर्पोरेट डेभलपमेन्ट बैंकको १३.०४, स्वाभिमान लघुवित्तको १०.८०, सिर्जनशील लघुवित्तको ७.३९ प्रतिशत मूल्य बढ्यो ।
टक्सार पिखुवाखोलाको मूल्य सबैभन्दा धेरै १४.०३ प्रतिशत घट्यो । त्यस्तै याम्बलिङ हाइड्रोपावरको ८.२३ प्रतिशत घट्यो । यी दुवै कम्पनीको मूल्य अघिल्लो दिनसम्म १५ प्रतिशत बढेका थिए । सूचीकृतपछि पहिलो पटक दुवै कम्पनीको मूल्य घटेको हो ।
सोपान फर्मास्युटिकल्सको ५.९०, श्रीनगर एग्रिटेकको ५.४९, पियोर इनर्जीको ५.४८ प्रतिशत मूल्य घट्यो । आज धेरै कारोबार भएका कम्पनीमा सिद्धार्थ बैंक, टक्सार पिखुवाखोला, आँखुखोला जलविद्युत्, एनआरएन इन्फ्रास्ट्रक्चर र याम्बलिङ हाइड्रोपावर छन् ।
