काठमाडौं । गृहमन्त्री सुधन गुरुङले सरकारले डोजर लगाएर हटाएका सुकुम्बासीसँग माफी मागेका छन् । विहीबार विहान बसेको राज्य व्यवस्था समितिको बैठकमा सांसदहरुले उठाएको जिज्ञासाको जवाफ दिने क्रममा मन्त्री गुरुङले सुकुम्बासीहरुको व्यवस्थापन राम्रोसँग गर्नमा राज्यबाट कमजोरी भएको स्वीकार्दै माफी मागेका हुन् ।
‘सबै सुकुम्बासी दाजुभाइ दिदीबहिनीहरुलाई मेरो तर्फबाट माफी माग्न चाहन्छु । किनभने मैले यो देखिरहँदा मलाई गाह्रो भएको थियो । म यसकै विषयमा धेरै खटेकाले हुनाले यो अलिकति राम्रो हिसाबमा गर्न सकिन्थ्यो होला । प्रिभेन्टिभ वे मा गर्न सकिन्थ्यो होला,’ उनले भने ।
गुरुङले सुकुम्बासीको अहिलेको अवस्था विपद् आएपछिको जस्तो रहेको पनि बताए । ‘विपद आइसकेपछिको फेज उहाँहरुको देखिएको छ । टेन्टमा बसेको, स्यानिटाइजेसनको कुरा छ । विपदजस्तै कुरा देखिएको छ,’ उनले भने ।
आफू आएपछि व्यवस्थापनका लागि अनुगमनमा जाने र तयारी गरेर निर्देशन जारी गर्ने गृहकार्यमा लागेको समितिलाई जानकारी गराए । सुकुम्बासी व्यवस्थापनमा संवेदनशील भएर लाग्ने प्रतिबद्धता गुरुङले जनाए ।
