हुम्ला । हिमाली जिल्ला हुम्लामा एन्फाको सहयोगमा चार वटा विद्यालयलाई सय वटा फुटबल प्रदान गरिएको छ। विद्यालयमा फुटवल कार्यक्रमअन्तर्गत फुटबलको विकास विद्यालय स्तरबाटै गर्न एन्फाले यो सहयोग गरेको हो।
फिफाको फुटबल फर स्कुल कार्यक्रमअन्तर्गत एन्फाले यो कार्यक्रम हुम्लामा लागू गरेको र यो कार्यक्रम सञ्चालन गर्न सय वटा फुटबल चार वटा विद्यालयलाई प्राप्त भएको यसको समन्वय गर्दे आएका धीरज रोकायाले बताए।
यो कार्यक्रमका लागि एन्फाले केही समयअगाडि अनलाइन फर्म खोेलेको र त्यसमा भर्ने विद्यालय छनोट भएका थिए। त्यसैअन्तर्गत हुम्लाका चार वटा विद्यालय छनोट भएको र तीमध्ये दुई वटा विद्यालय सिमकोट गाउँपालिकाको बालमन्दिर मावि र अदाचुली गाउँपालिकाको माउण्ट एभरेष्ट ऐकेडेमीलाई आइतबार एक कार्यक्रम आयोजना गरी प्रतिविद्यालय २५ वटा फुटबल प्रदान गरिएको हो।
अर्को छनोटमा परेको सर्केगार्ड गाउँपालिकाको हिमज्योति मावि सोमबार आउने र सोही दिन फुटबल प्रदान गरिनेछ। त्यस्तै छनोटमा परेको नाम्खा गाउँपालिकाको खीरपानी आनि रहेकोमा हाल उक्त विद्यालयमा पाँच जना मात्र विद्यार्थी अध्ययन गरिरहेको भन्दै सो विद्यालय बन्द हुने भएकाले उक्त विद्यालयका लागि आएका फुटबल वितरण गरिएको छैन।
ती फुटबल एन्फासँगको समन्वयमा हुम्लाको अर्को विद्यालयलाई प्रदान गरिनेछ। एन्फाले यति सहयोग गरिसकेपछि अब छनोट भएका विद्यालयले विद्यार्थीलाई फुटबल खेलको अभ्यास गराउनेछन्। यसका लागि बालमन्दिर माविले ४० जना विद्यार्थी छनोट गरेको जनाएको छ।
फुटबल हस्तान्तरण कार्यक्रममा सिमकोट गाउँपालिकाका अध्यक्ष विजय भणडरी, उपाध्यक्ष सुशीला भाम रोकाया, फुटबल क्लबका संरक्षक वसन्त रोकाया, सामाजिक विकास कार्यालयलका प्रमुख ईश्वरबहादुर सिंहले प्रदान गरेका थिए भने बालमन्दिर माविका प्रधानाध्यापक कैलाश रोकाया र एकेडेमी सञ्चालक नवराज महताराले बुझेका थिए।
