एजेन्सी । फिफा विश्वकपका लागि इंग्ल्याण्डले २६ सदसीय टोलीको नाम सार्वजानिक गरेको छ। प्रशिक्षक थोमस टुचेलले यसै महिनाको अन्तिममा सुरु हुने फिफा विश्वकपका लागि आफ्नो २६ सदस्यीय टोली सार्वजानिक गरेको हो। टोलीमा स्ट्राइकर इभान टोनी र ओली वाटकिन्सलाइ समेत समावेश गरिएको छ।
टोनीले यस सिजन साउदी प्रो लिग क्लब अल-अहलीका लागि उत्कृष्ट प्रदर्शन गरेपछि टोलीमा स्थान पाएका हुन्। अल-अहलीले एएफसी च्याम्पियन्स लिग एलिट उपाधि जित्दा उनले महत्त्वपूर्ण भूमिका खेलेका थिए। त्यस्तै, वाटकिन्सले एस्टन भिल्लाका लागि प्रभावशाली प्रदर्शन गरेका छन्। एस्टन भिल्लाले हालै यूईएफए युरोपा लिग उपाधि जित्दै अर्को सिजन च्याम्पियन्स लिग खेल्ने अवसर सुरक्षित गरेको छ।
त्यस्तै म्यानचेस्टर युनाइटेडका मिडफिल्डर कोबी माइन्उ पनि टोलीमा समावेश भएका छन्। उनले सिजनको अन्तिम चरणमा अन्तरिम प्रशिक्षक माइकल क्यारिकको नेतृत्वमा उत्कृष्ट प्रदर्शन गरेका थिए। तर अनुभवी डिफेन्डर ह्यारी म्याग्वाएर भने टोलीमा पर्न सकेनन्।
कोल पाल्मर, जसले चेल्सीलाई फिफा क्लब विश्वकप २०२५ जिताउन मद्दत गरेका थिए र यूईएफए युरो २०२४ को फाइनलमा स्पेनविरुद्ध गोल पनि गरेका थिए, चोटका कारण प्रभावित सिजन बिताएकाले अन्तिम टोलीमा समावेश हुन सकेनन्। म्यानचेस्टर सिटीका आक्रामक मिडफिल्डर फिल फोडेन पनि टोली बाहिर परेका छन्। साथै रियल म्याड्रिडका राइट-ब्याक ट्रेन्ट अलेक्जेन्डर-अर्नोल्डले पनि स्थान पाएनन्।
टुचेलले विश्वकप छनोट चरणमा शतप्रतिशत जित निकाल्दै इंग्ल्याण्डलाई सफलतापूर्वक अघि बढाउने अधिकांश खेलाडीहरूलाई कायम राखेका छन्। कप्तान ह्यारी केनको नेतृत्वमा इंग्ल्याण्डले १९६६ पछि पहिलो पटक विश्वकप जित्ने लक्ष्यमा रहेको छ।
यस्तो छ इंग्लिस टोली
गोलरक्षक: डिन हेन्डरसन, जोर्डन पिकफोर्ड, जेम्स ट्राफर्ड डिफेन्डर: ड्यान बर्न, मार्क गुएही, रिस जेम्स, एज्री कोन्सा, टिनो लिभ्रामेन्टो, निको ओ’राइली, जारेल क्वान्सा, जेड स्पेन्स, जोन स्टोन्स मिडफिल्डर: एलियट एन्डरसन, जुड बेलिङ्घम, एबेरेची एजे, जोर्डन हेन्डरसन, कोबी माइन्उ, डेक्लान राइस, मोर्गन रोजर्स फर्वार्ड: एन्थोनी गोर्डन, ह्यारी केन, नोनी मडुके, मार्कस रासफोर्ड, बुकायो साका, इभान टोनी र ओली वाटकिन्स रहेका छन् ।
