गान्तोक। सिक्किमका प्रख्यात पर्वतारोही कुन्जाङ ग्यात्सो भुटियाको जीवन र योगदानमा आधारित पुस्तक “कुन्जाङ ग्यात्सो भुटिया (एभरेष्टर): स्टोरी अफ सिक्किम्स भिजनरी माउन्टेनियर” (Kunzang Gyatso Bhutia (Everester): Story of Sikkim’s Visionary Mountaineer) भव्य रूपमा विमोचन गरिएको छ।
डा. विधुप्रकाश कायस्थद्वारा लिखित यस पुस्तकको विमोचन शुक्रबार गान्तोकको होटल सेडलोनमा आयोजित एक विशेष समारोहका बीच सम्पन्न भयो।
१२० पृष्ठको यस पुस्तकले पाठकहरूलाई सिक्किमको पर्वतारोहणको इतिहाससँग जीवन्त रूपमा जोड्नेछ। विषयवस्तु: पुस्तकमा एभरेष्टर कुन्जाङ ग्यात्सोको प्रेरणादायी जीवन यात्राका साथै सिक्किममा पर्वतारोहणको इतिहास, यस क्षेत्रका चुनौतीहरू, सम्भावनाहरू र यहाँका प्रमुख हिमचुचुराहरूको विस्तृत विवरण समेटिएको छ। यो पुस्तक पर्वतारोहण क्षेत्रमा रुचि राख्ने आगामी पुस्ता र युवा पर्वतारोहीहरूका लागि एक महत्वपूर्ण मार्गदर्शक सिद्ध हुने विश्वास व्यक्त गरिएको छ।
कार्यक्रममा बोल्दै अतिथिहरूले सिक्किमको पर्यटन र साहसिक खेलकुदको क्षेत्रमा कुन्जाङ ग्यात्सो भुटियाको योगदानको चर्चा गरे भने लेखक डा. कायस्थलाई सिक्किमको पर्वतारोहण इतिहासलाई लिपिबद्ध गरेकोमा बधाई समेत ज्ञापन गरे। सिक्किम माउन्टेनियरिङ एशोसिएशन (SMA) को तत्त्वावधानमा २२ मे २०२६ का दिन गान्तोकको एक स्थानीय होटलमा ‘एभरेष्ट डे सिक्किम २०२६’ (Everest Day Sikkim 2026) भव्यताका साथ मनाइको उक्त समारोह भारतकै अग्रणी हिमालयन आरोही तथा सन् १९६५ मे २२ मा सगरमाथाको सफल आरोहण गर्ने सिक्किमका प्रथम व्यक्ति स्व. सोनाम ग्यात्सोको सम्झना र सम्मानमा यो दिवस मनाइएको हो। स्व. सोनाम ग्यात्सोप्रति श्रद्धाञ्जली: ४२ वर्षको उमेरमा सगरमाथा आरोहण गरेर तत्कालीन समयमा विश्वकै सबैभन्दा बढी उमेरका आरोही बनेका र बिना अक्सिजन ५० मिनेट शिखरमा बिताएर कीर्तिमान राखेका पद्मश्री, पद्मभूषण तथा अर्जुन अवार्ड विजेता स्व. सोनाम ग्यात्सोको योगदानको स्मरण गरियो।
मुख्य अतिथि मन्त्री राजु बस्नेतले नयाँ सम्भावनाहरू पहिल्याउनु पर्नेमा जोड दिँदै ओलम्पिक खेलमा समावेश गरिएको ‘स्पोर्ट्स क्लाइम्बिङ’ लाई सिक्किममा प्रवर्द्धन गर्न सरकारले सहयोग गर्ने प्रतिबद्धता जनाउनुभयो। पर्यटन विभागका अध्यक्ष श्री सोनाम नोर्गे लाचुङ्पाले सिक्किममा करिब १३० वटा नामकरण गरिएका हिमालहरू रहेको जानकारी दिँदै एड्भेन्चर टुरिजम (ट्रेकिङ, र्याफ्टिङ, रक क्लाइम्बिङ आदि) को विकासमा जोड दिनुभयो। सिक्किम माउन्टेनियरिङ एशोसिएशनका अध्यक्ष कुन्जाङ ग्यात्सो भुटिया (सिक्किमबाट सगरमाथा चढ्ने दोस्रो व्यक्ति) ले सन् २००५ मा स्थापना भएको यस संस्थाले हालसम्म ५ वटा मुख्य चुचुराहरूमा अभियान चलाएको र सयौँ युवाहरूलाई पर्वतारोहणको तालिम दिइसकेको जानकारी गराउनुभयो।
पर्वतारोहणको क्षेत्रमा पुर्याएको योगदानको कदर गर्दै पूर्व आईपीएस अधिकारी तथा एसएमएका पूर्व अध्यक्ष श्री एस.टी. भुटियालाई ‘सिक्किम माउन्टेनियरिङ एशोसिएशन गोल्ड मेडल २०२६’ प्रदान गरियो। सिक्किम विश्वविद्यालयका सह-प्राध्यापक डा. जिग्मे भुटियालाई ‘एवार्ड अफ एक्सीलेन्स’ द्वारा सम्मानित गरियो। यसका साथै राज्यका १६ जना वरिष्ठ पर्वतारोही तथा सगरमाथा आरोहीहरूलाई पनि कार्यक्रममा सम्मान गरियो। उक्त गरिमामय कार्यक्रममा पर्यटन विभागका अध्यक्ष श्री सोनाम नोर्गे लाचुङ्पा, एसटिडिसीका अध्यक्ष श्री लुकेन्द्र रासाइली, खेलकुद विभागकी सचिव श्री याङ्चेन डी. तामाङ लगायत वरिष्ठ सरकारी अधिकारीहरू र पर्वतारोहण क्षेत्रका दिग्गज व्यक्तित्वहरूको बाक्लो उपस्थिति रहेको थियो। कार्यक्रममा स्वागत भाषण प्रचार सचिव श्री प्रबिन खालिङले र धन्यवाद ज्ञापन कोषाध्यक्ष श्री सुवेन गुरुङले गर्नुभएको थियो।
