पत्रकार नै हुन् अभिजीत दीप्के । हाल उनी बिश्वभर चर्चित छन् । जताततै चासो छ , आखिर को हुन् भारतमा ‘कक्रोज जनता पार्टी’ बनाउने अभिजीत दीप्के ? ‘आम आदमी पार्टी’सँग पुरानो कनेक्सन रहेको यिन्को बिगत छ ।
“दीप्केले भारतको पुणेबाट पत्रकारितामा स्नातक गरेका छन् भने अमेरिकाको बोस्टन विश्वविद्यालयबाट पब्लिक रिलेसन्समा स्नातकोत्तर गरेका छन् ।”
इन्स्टाग्राममा भारतीय जनता पार्टी (बीजेपी) लाई उछिन्दै चर्चामा आएको व्यंग्यात्मक ‘ककरोज जनता पार्टी’ (Cockroach Janta Party – CJP) का संस्थापक अभिजीत दीप्केको बारेमा चासो बढेको छ।
पुणेका ३० वर्षीय अभिजीत दीप्केले हालै मात्र सुरु गरेको यो डिजिटल आन्दोलनले छोटो समयमै ९० लाखभन्दा बढी इन्स्टाग्राम फलोअर्स बनाएर बीजेपीको आधिकारिक खातालाई पछाडि छोडिदिएको छ।
को हुन् अभिजीत दीप्के ?
अभिजीत दीप्के पुणेबाट पत्रकारितामा स्नातक गरेका भारतीय नागरिक हुन् । उनले अमेरिकाको प्रतिष्ठित बोस्टन विश्वविद्यालयबाट पब्लिक रिलेसन्समा स्नातकोत्तर गरेका थिए ।
उनी २०२० देखि २०२३ सम्म अरविन्द केजरीवाल नेतृत्वको आम आदमी पार्टी (AAP) सँग आबद्ध थिए। AAP को दिल्ली विधानसभा चुनावमा मीम्स र डिजिटल क्याम्पेनिङको क्षेत्रमा सक्रिय थिए। पछि उनी राजनीतिबाट अलग भएर उच्च शिक्षा र अन्य काममा संलग्न भएका थिए।
‘ककरोज जनता पार्टी’ को जन्म कसरी भयो ?
यो पार्टीको सुरुवात भारतका मुख्य न्यायाधीश सूर्यकान्तले सामाजिक सञ्जालमा सक्रिय युवाहरूलाई ‘ककरोच’ र ‘परजीवी’ भनेर गरेको टिप्पणीबाट भएको हो। उक्त टिप्पणीपछि युवाहरूमा उत्पन्न आक्रोशलाई दीप्केले ‘ककरोज जनता पार्टी’ मार्फत व्यंग्यात्मक रूप दिएका हुन्।
पार्टीले आफूलाई ‘युवाहरूको, युवाहरूद्वारा र युवाहरूका लागि’ राजनीतिक मञ्च भनेको छ। यसको नारा छ – ‘धर्मनिरपेक्ष, समाजवादी, लोकतान्त्रिक र अल्छी’।
सदस्यता लिने फारममा नै व्यंग्य गरिएको छ। सदस्य बन्न ‘बेरोजगार, अल्छी, सधैं अनलाइन रहने र भडास निकाल्न रुचाउने’ हुनुपर्ने उल्लेख छ।
यसैबीच, पार्टीले ५-सूत्रीय घोषणापत्र जारी गरेको छ जसमा निम्न माग छन् :
१) न्यायाधीशहरूलाई सेवानिवृत्तिपछि कुनै पनि राजनीतिक नियुक्ति नदिने
२) महिलाका लागि संसद र मन्त्रिपरिषद्मा ५० प्रतिशत आरक्षण
३) दलबदलु (स्वार्थको लागि पार्टी परिवर्तन गरिरहने) नेताहरूमाथि २० वर्षको प्रतिबन्ध
४) परीक्षा पेपर लीकमा कडा कारबाही
५) युवा बेरोजगारी समाधान र मिडिया स्वतन्त्रता
‘ककरोज जनता पार्टी’ अहिलेसम्म भारतको निर्वाचन आयोगमा औपचारिक रूपमा दर्ता भएको छैन। तर यसले छोटो समयमै ठूलो युवा समर्थन जुटाएको छ। पार्टीले छिट्टै ‘जेन-जी भर्चुअल कन्फेरेन्स’ आयोजना गर्ने तयारी गरेको छ।
सामाजिक सञ्जालमा यो अभियानबारे मिश्रित प्रतिक्रिया आएको छ। कसैले यसलाई युवा असन्तुष्टिको ठूलो अभिव्यक्ति मानेका छन् भने कसैले सामान्य इन्टरनेट ट्रेन्ड मात्र भनेका छन्।
के यो अभियानले भविष्यमा ठोस राजनीतिक रूप लिन्छ वा केवल डिजिटल विद्रोहको रूपमा रहन्छ, त्यो भने समयले देखाउने छ।
