काठमाडौं । नेपाली कांग्रेसको संस्थापनइतर पक्षको भेला काठमाडौंमा सुरु भएको छ । बबरमहलस्थित कार्की ब्याङक्वेटमा भेला सुरु भएको नेता डा. प्रकासशरण महतले जानकारी दिए ।
भेलामा वाग्मती प्रदेशका जिल्ला सभापति, निर्वाचित प्रतिनिधिको सहभागिता रहेको उनले बताए । “पार्टीको बृहत्त् एकताका लागि भेला बोलाइएको हो । जुन खालको समझदारी हुनुपर्ने हो, अझै हुन सकेको छैन,” महतले बाह्रखरीसँग भने, “एक-दुईपटकको भेटले सार्थक निष्कर्ष आइसकेको छैन ।”
कांग्रेस सभापति गगनकुमार थापाले वैशाख २९ गते केन्द्रीय कार्यसमितिमा १९ जना मनोनयन गरेपछि इतर पक्ष चिढिएको छ ।
देउवा पक्षका नेता पूर्णबहादुर खड्का तथा नेता डा. शेखर कोइरालाले केन्द्रीय कार्यसमितिमा गरिएको मनोनयनलाई लिए असन्तुष्टि जनाएका छन् । दुवै नेताले उक्त मनोनयनले बृहत्तर पार्टी एकतामा ठेस पुगेको उल्लेख गरेका छन् ।
महतले पछिल्लो मनोनयन आफूहरूको सहमति भन्दा पनि व्यक्तिगत रूपमा भएको बताए । “जानेहरू व्यक्तिगत रूपले गएका हुन् । १५औँ महाधिवेशन निष्पक्ष रूपमा हुन्छ भन्ने सुनिश्चितता हुनुपर्यो,” महतले भने, “समझदारी गरेको छैन । एक-दुईपटक कुरा भए पनि कुनै समझदारी भएको छैन । भेलाले एकताको समझदारीको विषय टुंगो लगाउनेछ ।”
संस्थापन पक्षले प्रदेशस्तरीय भेला गरिरहँदा इतर पक्षले पनि समानान्तर रूपमा भेला सुरु गरेको छ । देउवा पक्षले मंगलबार कोसीको विराटनगरमा भेला गरेको थियो । कोसीको जिम्मा नेता कृष्णप्रसाद सिटौलालाई दिइएको थियो । वाग्मतीमा भेलाको समन्वय प्रकाशमान सिंह र महतले गरेका छन् ।
