हुम्ला । हिमाली जिल्ला हुम्लामा पहिलो पटक डेङ्गु सङ्क्रमण पुष्टि भएको छ ।
जिल्ला अस्पतालमा उपचाररत एक बिरामीमा गरिएको स्वाब परीक्षणमा डेङ्गु संक्रमण पुष्टि भएको हो । स्वास्थ्य सेवा कार्यालयका प्रमुख चिकित्सक उमाकान्त तिवारीका अनुसार डेङ्गु पोजिटिभ देखिएका बिरामी सिमकोट गाउँपालिका–२ का ४५ वर्षीय मोती सुनार हुन् । उनी तीन दिनअघि स्वास्थ्य समस्या देखिएपछि उपचारका लागि जिल्ला अस्पताल पुगेका थिए । हाल सुनारलाई अस्पतालमै भर्ना गरेर उपचार भइरहेको छ।
डेङ्गु पुष्टि भएसँगै केही दिन अझै निगरानीमा राखेर उपचार गरिने चिकित्सक तिवारीले जानकारी दिए । संक्रमित सुनार हालसम्म जिल्ला बाहिर ननिस्किएको पाइएको छ। यसले हुम्लामै डेङ्गु संक्रमण फैलिएको संकेत देखिएको चिकित्सकहरूको धारणा छ।
मौसममा आएको परिवर्तन, तापक्रम वृद्धि र लामखुट्टेको संख्या बढ्न थालेसँगै यस्तो संक्रमण देखिएको हुन सक्ने अनुमान गरिएको छ । स्वास्थ्य अधिकारीहरूले यसलाई गम्भीर रूपमा लिँदै सतर्कता अपनाउन आग्रह गरेका छन् ।
