एजेन्सी । टी-२० विश्वकप अन्तर्गत समुह ‘डी’ को आफ्नो दोस्रो खेलमा दक्षिण अफ्रिकाले अफगानिस्तान विरुद्ध सनसनिपूर्ण जित हासिल गरेको छ। निर्धारित २० ओभरको खेल बराबरी भएपछि सुपर ओभर मार्फत खेलको निर्णय भएको थियो।
जहाँ पहिलो सुपर ओभर पनि बराबरी भएपछि खेल दोस्रो सुपर ओभरमा पुगेको थियो। दोस्रो सुपर ओभरमा दक्षिण अफ्रिकाले दिएको २४ रनको लक्ष्य पछ्याएको अफगानिस्तान १९ रनमा समेटिन पुग्दा दक्षिण अफ्रिका विजयी भएको हो।
दोस्रो सुपर ओभरमा पहिले ब्याटिङ गरेको दक्षिण अफ्रिकाले डेभिड मिलरले ४ बलमा २ चौकाको सहयोगमा १६ रन बनाएका थिए भने ट्रिस्टन स्टब्सले २ बलमा १ छक्काको सहयोगमा ७ रन बनाएका थिए। २४ रनको लक्ष्य पछ्याएको अफगानिस्तानले सुरुवात २ बलमा पहिलो बलमा डट र दोस्रो बलमा विकेट गुमाएपनि त्यसपछि क्रिजमा आएका रमनुल्लाह गुर्वाजले लगातार ३ बलमा ३ छक्का प्रहार गर्दै १८ रन बनाए ओभरको अन्तमि बलमा दक्षिण अफ्रिकी बलर केशब महाराजाले वाइड फाले। त्यसपछि जितका लागि अन्तिम बलमा अफगानिस्तानलाइ जितका लागि ५ रन चाहिएको थियो। तर उनले उठाएर प्रहार गरेको बल क्याच हुन पुग्दा अफगानि खेलाडीको आँखामा आँशु देखिएको थियो।
त्यसअघि पहिलो सुपर ओभरमा पहिले ब्याटिङ गर्दै अफगानिस्तानले १७ रन बनायो। उसका ओपनर अज्मतुल्लाह ओमरजाइले ५ बलमा १६ रन बनाउँदा रमनुल्लाह गुर्वाजले १ रन बनाए। जवाफमा दक्षिण अफ्रिकाले पनि १७ रननै बनायो। उसका लागि ट्रिस्टन स्टब्सले १० रन बनाउँदा डेवार्ड ब्रेभिसले ६ तथा डेभिड मिलरले १ रन बनाएका थिए। त्यसपछि खेल सुपर ओभरमा पुगेको थियो।
त्यसअघि निर्धारित २० ओभरको खेलमा टस हारेर पहिले ब्याटिङ गरेको दक्षिण अफ्रिकाले निर्धारित २० ओभरमा ६ विकेट गुमाएर १ सय ८७ रन बनाएको थियो। उसका लागि रयान रिकेल्टनले ६१ रनको अर्धशतकीय इनिङ खेल्दा क्विन्टन डिककले पनि ५९ रनको अर्धशतकीय इनिङ खेलेका थिए। त्यस्तै डेवाल्ड ब्रेभिसले २३ तथा डेभिड मिलरले २० रनको नटआउट इनिङ खेले। जवाफमा अफगानिस्तान १८.४ ओभरमा अलआउट हुँदै १ सय ८७ रननै बनाउन सक्यो।
उसका लागि रहमनुल्लाह गुर्वाजले ८४ रनको इनिङ खेल्दा अजमतुल्लाह ओमरजाइले २२ तथा कप्तान रसिद खानले २० रन बनाएका थिए।
हारसँगै अफगानिस्तानको सुपर आठको सम्भावना कमजोर बनेको छ। प्रतियोगितामा दक्षिण अफ्रिका र न्युजिल्यान्डले आफ्ना दुबै खेलमा जित हासिल गरेका छन्। यसअघि पहिलो खेलमा अफगानिस्तान न्युजिल्यान्डसँग पनि हाइस्कोरिङ खेलमै पराजित भएको थियो। जहाँ अफगानिस्तानले १ सय ८२ रन बनाएपनि न्युजिल्यान्डले १७ बल अगाडीनै ५ विकेट गुमाएर लक्ष्य पुरा गरेको थियो।
