दमक । नेकपा (एमाले) का अध्यक्ष केपी शर्मा ओली गृहनगर दमक पुगेका छन् ।
काठमाडौंबाट भद्रपुर विमानस्थल झरेका उनी सोझै दमक पुगेका हुन् । जेनजी आन्दोलनपछि पहिलोपटक झापा आएका ओली यसपटक होटलमै बसेर राजनीतिक गतिविधि गर्ने बताइएको छ । उमेदवारी दर्ता गराउने प्रयोजनका लागि झापा आएका ओली हरेक पटक दमक आउँदा आफ्नै निवासमा छलफल र बैठक गर्दथे ।
पार्टीका नेता तथा कार्यकर्तालाई भेट्थे । तर, यस पटक भने उनले होटलबाटै यी सबै काम गर्दै छन् । गत असार अन्तिम सातायता ओली गृहजिल्ला झापा आएका थिएनन् । उनले केहीदिन निर्वाचन क्षेत्रमा नै बिताउने भएका छन् ।
जेनजी आन्दोलनका क्रममा दमकस्थित ओली निवासमा आगजनी भएको थियो । त्यसको मर्मतको काम नभएकाले ओलीले यसपटक चुनावी गतिविधिका लागि उनले आवासको व्यवस्थापन बाहिर नै गर्ने भएका हुन् । यसका लागि घरहरू खोजी भइरहेको बताइएको छ । ओलीलाई सोमबार (माघ ४) बस्नका लागि दमकको मिक होटलमा व्यवस्था मिलाइएको छ । विमानस्थलबाट सिधै ओली बिर्तामोड हुँदै दमक गएको एमाले झापाका अध्यक्ष प्रेम गिरीले जानकारी दिएका छन् । दिउँसो २ः३० बजे दमकमा पत्रकार सम्मेलन गरेर आफ्ना धारणा राख्दै छन् ।
