काठमाडौं। नेपालका लागि दिपलको आधिकारिक विक्रेता एमएडब्लू वृद्धिले नयाँ विद्युतीय गाडी ‘दिपल इ०७ ट्रान्सफर्मर एक्स’ सार्वजनिक गर्ने तयारी गरेको छ । बटन थिचेकै भरमा प्रिमियम एसयूभीबाट पिकअपमा परिवर्तन हुन सक्ने यसअघिको ई ०७ को विशेषतालाई निरन्तरता दिँदै कम्पनीले यसको नयाँ संस्करण ल्याउन लागेको हो ।
कम्पनीका अनुसार नयाँ ई ०७ मा ‘एड्भान्स एयर सस्पेन्सन सिस्टम’ जडान गरिएको छ । यसले म्याजिक कार्पेटको ड्राइभिङ अनुभव दिने बताइएको छ । त्यस्तै यसमा भएको कन्टिन्युअस ड्याम्पिङ कन्ट्रोल (सीडीसी) प्रविधिको सहायताले सडकको अवस्था अनुसार सवारीलाई सन्तुलित राख्न सकिन्छ ।
यसका चार ओटै सिटमा मसाज, हिटिङ र भेन्टिलेसनको सुविधा रहेको छ । क्याबिनमा नाप्पा लेदरको प्रयोग गरिएको छ भने अगाडिका सिट १४-तरिकाले पावर-एडजस्ट गर्न सकिन्छ । लामो यात्रामा आरामदायी बनाउन यसमा ‘जिरो ग्राभिटी’ रिल्याक्सेसन मोड समेत समावेश छ ।
पछाडि बस्ने यात्रुका लागि छुट्टै कन्ट्रोल सिस्टम उपलब्ध गराइएको छ । यसबाट ट्रङ्क र रियर डोम खोल्ने, सिट हिटिङ र भेन्टिलेसन मिलाउने, सनशेड र एयर-कन्डिसनिङ नियन्त्रण गर्ने तथा पछाडिको सिट फोल्ड गर्ने सुविधा प्रयोग गर्न सकिन्छ ।
यी थप गरिएका प्राविधिक तथा विलासी सुविधाले गर्दा नयाँ दिपल ई ०७ ट्रान्सफर्मर एक्स अघिल्लो भर्सनको तुलनामा बढी विकसित र सुविधायुक्त हुने कम्पनीको धारणा छ ।
