काठमाडौं । प्रगतिशील लोकतान्त्रिक पार्टी (प्रलोपा)का नेता सन्तोष परियारले राष्ट्रिय संकट समाधानका लागि सामूहिक पहल नगरै देश थप संकटमा फस्न सक्ने जनाएका छन्।
आज काठमाडौंको राष्ट्रिय सभागृहमा आयोजित एकता घोाषणा सभालाई सम्बोधन गर्दै परियारले अग्रज पुस्ताको अनुभव र जेनजी पुस्ताको भावनालाई समेट्दै अघि बढ्ने जनाए।
‘लामो समयदेखि बहुदलीय प्रजातन्त्र र गणतन्त्रका लागि सङ्घर्ष गर्यौँ। हामीसँग अहिले चारवटा संकट छ। पहिलो राष्ट्रियताको संकट छ। जेनजी विद्रोहपछि राष्ट्रियता ठुलो संकट देखिन्छ। दोस्रो लोकतन्त्रमाथि संकट छ। संविधान प्रदत्त लोकतान्त्रिक अधिकार खोसिने हो कि भन्ने खतरा छ। अर्को संविधानमाथि पनि धेरै संकट छ। मुर्झाएको छ। यसको संरक्षण गर्नु आवश्यक छ। चौथो आर्थिक संकट गहिरिएको छ। संकटपूर्ण घडीमा हामीले सामूहिक बुद्धिमत्ता अपनाएनौँ भने यो देश थप संकटमा पर्न सक्छ’, उनले भने।
सरकार र नागरिकबिच विश्वासको संकट गरिएकोप्रति चिन्ता व्यक्त गर्दै उनले आफ्नो पुस्ताको सबैभन्दा ठुलो चुनौती राज्यको गुमेको विश्वास फर्काउने रहेको जनाए।
कार्यक्रमको अध्यक्षता समेत गरेका परियारले जेनजी आन्दोलनपछि विकसित घटनाक्रमले देश संकटमा परेको भन्दै उनले सबै वामपन्थी लोकतान्त्रिक प्रगतिशील पार्टीहरुलाई संकिर्णता छोडेर आफूहरुको अभियानमा जोडिन आह्वान गरे।
