अमेरिकामा सयौं उडान रद्द हुने

काठमाडौं । अमेरिकामा भोलिदेखि सयौं उडान रद्द हुने भएको छ। भोलिदेखि एयरलाइन्सहरूले उडान रद्द गर्ने भएका हुन्। अमेरिकी इतिहासकै सबैभन्दा लामो सरकारी शटडाउन चलिरहेका कारण देशभर उडानमा अवरोध भएको हो।

फेडरल एभिएशन अथोरिटीको निर्देशनपछि भोलिदेखि एयरलाइन्सहरूले उडान रद्द गर्ने घोषणा गरेका हुन्। पछिल्लो एक महिनादेखि एयर ट्राफिक कन्ट्रोलरहरूको स्टाफ कम हुँदा धेरै विमानस्थलहरूमा ढिलाइ भइरहेको थियो। यी कन्ट्रोलरहरूलाई शटडाउनको समयमा तलब दिइएको छैन।

यदि अमेरिकी सरकारी शटडाउन समाप्त नभए आगामी केही दिनमा ४० प्रमुख विमानस्थलहरूमा हवाई यात्रा १०% सम्म घट्नेछ र हजारौँ उडान रद्द हुनेछन् भन्ने चेतावनी अमेरिकी यातायात मन्त्री सीन डफीले दिएका छन्।

दैनिक ३,५०० देखि ४,००० सम्म उडान रद्द हुन सक्ने अनुमान गरिएको छ। अमेरिकी मिडियाले अन्तर्राष्ट्रिय उडानहरू भने प्रभावित नहुने रिपोर्ट गरेका छन्।

हेदर बोशले भनिन्, ‘बोस्टन जाने उडान ढिला हुँदै रद्द भयो। पछि अर्को उडानमा रिबुक गरियो, तर त्यो उडान पनि ढिलाइ भएको छ। अहिले म अरू विकल्पहरू सोचिरहेको छु।’

सीएनएनका डेनी फ्रीम्यानसँग कुरा गर्दै उनले भनिन्, ‘पहिलो उडान रद्द भएको खबर सुनेपछि आफूले तुरुन्तै कार भाडामा लिएर जाने, होटलमा बस्ने, वा परिवारलाई रातिको खानामा घर नपुग्ने जानकारी दिने लगायतका धेरै सम्भावित योजना सोच्न थालेको छु।’

यात्रु जुली चार्नेटले भनिन, ‘आज राति नै मेरो उडान भएकै राम्रो भयो, भोलि भएको भए त एयरलाइन्सले सयौँ उडान रद्द गर्दैछन् भन्ने थाहा पाएँ। यसले साँच्चिकै समस्या पर्ने थियो।’