काठमाडाैं । दृष्टि न्यूज अनलाइनमा प्रकाशित समाचारका विषयमा अदालतमा जवाफ दिन उक्त मिडियाका सम्पादक तथा सञ्चालक शम्भु श्रेष्ठ विशेष अदालत पुगेका छन्।
विशेष अदालतले दृष्टि न्यूज अनलाइनलाई प्रकाशित समाचारका विषयमा कारण देखाऊ आदेश जारी गरेको छ । आफैँले प्रतिवेदनबाट उठान गरेको अवहेलना मुद्दामा ६ जना न्यायाधीशको इजलासले कारण देखाऊ आदेश दिएको थियो।
दृष्टि न्यूज अनलाइनमा आइतबार प्रकाशित ‘विशेष अदालतमा विचौलियाको चलखेल हटेन, सेटिङका मुद्दामा ३ महिनामै सफाइ’ शीर्षकको समाचारले अदालतको मानहानि भएको भन्दै कर्मचारी नवराज अधिकारी अवहेलना मुद्दा दायर गरेका थिए।
विशेष अदालतका अध्यक्ष टेकनारायण कुँवर र सदस्यहरू तेजनारायण सिंह राई, रामबहादुर थापा, मुरारीबाबु श्रेष्ठ, रितेन्द्र थापा र विदुर कोइरालाको इजलासले मंगलबार उक्त आदेश गरेको थियो।
अदालतले यसमा के कसो भएको हो, निवेदन र प्रतिवेदनको माग बमोजिम यस अदालतको अवहेलनामा किन कारवाही र सजाय हुनु नपर्ने हो? यस अदालतको अवहेलनामा कारवाही र सजाय हुनु नपर्ने भए सोको आधार, कारण र प्रमाण सहित यो आदेश प्राप्त भएको मितिबाट बाटोको म्यादबाहेक तीन दिनभित्र अदालतमा जवाफ दिन आदेश गरेको थियो। सोही आदेशबमोजिम जवाफ दिन दृष्टिका सम्पादक तथा सञ्चालक श्रेष्ठ विदेश अदालत पुगेका हुन्।
उक्त म्याद थाम्न थमाउनसमेत नपाउने गरी विपक्षी दृष्टि मिडिया प्रा. लि.का शम्भुलाल श्रेष्ठ, एम. पी. सुब्बा तथा संवाददाता आफैँ अदालतसमक्ष बयान गर्न उपस्थित हुनू भनी विशेषले आदेश दिएको थियो।
अदालतबाट अर्को आदेश नभएसम्म दृष्टि न्यूज अनलाइनमा प्रकाशित ‘विशेष अदालतमा विचौलियाको चलखेल हटेन, सेटिङका मुद्दामा ३ महिनामै सफाइ’ शीर्षकमा प्रकाशित र प्रसारित सामग्री परिवर्तन नगरी जे जस्तो अवस्थामा छ त्यहीँ अवस्थामा राख्न पनि आदेशमा उल्लेख थियो। श्रेष्ठ जवाफ दिन अदालतमा उपस्थित हुँदा मिडियाकर्मीहरूको बाक्लो उपस्थिति थियो।
