काठमाडौं । कांग्रेस महामन्त्री गगन थापाविरुद्ध सर्वोच्च अदालतमा अवहेलना मुद्दा दर्ता भएको छ।
तत्कालीन प्रधानमन्त्री केपी शर्मा ओलीले संवैधानिक निकायमा नियुक्त विवादित ५२ पदाधिकारीविरुद्धको रिटको सुनुवाइमा सर्वोच्चले ‘डिल गरेको’ गरेको भन्ने थापाको अभिव्यक्तिले अदालतको अवहेलना गरेको भन्दै मुद्दा दर्ता भएको हो।
अधिवक्ताहरू अनन्तराज लुइँटेल, अभिमा उप्रेती र विशाल थापाले शुक्रबार पेश गरेको अवहेलनाको निवेदन आइतबार दर्ता भएको छ। सर्वोच्च प्रशासनका अनुसार प्रारम्भिक सुनुवाइका लागि मंगलबार पेशी तोकिएको छ।
महामन्त्री थापाले बिहीबार काठमाडौँमा आयोजित ‘आजको लोकतन्त्रः अवसर र चुनौती’ विषयक संवाद कार्यक्रममासंवैधानिक आयोगका पदाधिकारीहरुलाई अदालतले ‘तलाई हान्दिउँ’ भन्दै झुलाइरहेको बताएका थिए।
आयोगका पदाधिकारीहरुको कार्यकाल सकिने समय भइसक्दा समेत सर्वोच्चले नियुक्तिको न्यायिक परीक्षण नगरेको भन्दै उनले अदालतले डिल गरेको दाबी गरेका थिए।
उनले भने, ‘आइतबार हेरुम, पख्लास् शुक्रबारसम्म भनेर अल्झाइरहेको छ । अदालतले डिल गर्यो अब त्यसको विश्वसनीयता के रहन्छ ? अनि अख्तियारले यी विषयमा मैले अनुसन्धान गरे भन्छ । अनुसन्धान गरिसकेपछि मैले फलानो फलानो व्यक्तिलाई दोषी पाएको छु। उ आफैंले समाचार दिन्छ । अनि आफैं कारबाही गरुँ कि नगरुँ भनेर राजनीतिक डिल गर्न थाल्छ।’
लोकतन्त्रको कडीका रुपमा रहेका संस्थाहरुप्रति जनताको विश्वास घट्दै गएको थापाको भनाइ थियो। त्यसमा सर्वोच्चको भूमिका सन्तोषजनक नभएको उनको दाबी थियो। उक्त भनाइले अदालतको अवहेलना भएको भन्दै निवेदन दर्ता गरिएको हो।
