काठमाडौं । अछाम, बान्निगढी जयगढ गाउँपालिका-३ जयगढ बजारस्थित पुष्पराज शर्माले संचालन गरेको आईएमईमा मंगलबार बेलुकी लागेको आगो फैलिएर सोही ठाउँस्थित सार्वजनिक सभाहल समेत १८ वटा घर र ती घरमा रहेका पसलहरू लगायतका भौतिक संरचनाहरू जलेर करिब ७ करोड ५४ लाख रूपैयाँ बराबरको धनमाल नष्ट भएको छ ।
ओखलढुंगा, मोलुङ गाउँपालिका-५ केउरेनी बस्ने तेज वहादुर मग्रातीको घरमा विद्युत सर्ट भई मंगलबार राति आगलागी हुँदा घर र घर भित्र रहेका नगद, २ तोला सुन, अन्नपात, लत्ताकपडा, भाँडावर्तन लगायतका सामान जलेर करिब ७ लाख रूपैयाँ बराबरको धनमाल नष्ट भएको छ ।
मोरङ, ग्रामथान गाउँपालिका-७ धोबियारे बस्ने गीतादेवी ठाकुरको ४ वटा कच्ची घरमा विद्युत सर्ट भई मंगलबार दिउँसो आगलागी हुँदा करिब ४ लाख रूपैयाँ बराबरको धनमाल जलेर नष्ट भएको छ । सुनसरी, दुहबी नगरपालिका-१२ पूर्व कुशाहा बस्ने रौदीलाल माझीको गोठमा गए राति लागेको आगो फैलिएर सोही ठाउँ बस्ने गणेश बिकको गोठमा आगलागी हुँदा दुबै जनाको गरी करिब ३ लाख ८० हजार रूपैयाँ बराबरको धनमाल जलेर नष्ट भएको छ ।
प्रहरीले स्थानीय बासिन्दा तथा दमकलको सहयोगमा आगलागी नियन्त्रणमा लिनुका साथै यस सम्बन्धमा आवश्यक अनुसन्धान गरिरहेको छ ।
