काठमाडौं । नेपाली कांग्रेसका महामन्त्री विश्वप्रकाश शर्माले कुलमान घिसिङलाई नेपाल विद्युत प्राधिकरणको प्रबन्ध निर्देशकबाट हटाएर सरकारले गलत गरेको जनाएका छन् ।
बिहीबार संसद् भवन परिसरमा सञ्चारकर्मीसँग कुरा गर्दै उनले आफू र अर्का महामन्त्री गगनकुमार थापाले प्रधानमन्त्री र मन्त्रीलाई सुझाव दिँदा कुलमानलाई नहटाउन भनेको पनि स्मरण गराए ।
कांग्रेस पदाधिकारी बैठकमा पनि कुलमानलाई हटाउन नहुने दिशामै छलफल भएको उनले जनाए । उनलाई हटाउने कुरामा पदाधिकारी बैठकको सहमति नरहेको शर्माले जनाए ।
‘अहिले जे निर्णय भएको छ, यो निर्णय हुँदै गर्दा हामीले नगर्नुस् गर्नु हुन्न भन्ने हो’, उनले थपे, ‘ ।’त्यहाँसम्मको सन्दर्भमा हामीले गम्भीरतापूर्वक यो विषय भनेका थियौ ।’
कुलानलाई प्राधिकरणबाट बर्खास्त गरिएको प्रकरण अब अदालतको विषय भइसकेको जनाउँदै उनले माओवादी केन्द्रसहित प्रतिपक्षीहरूले संसद् अवरुद्ध गर्नु उचित नहुने दाबी गरे ।
महामन्त्री शर्माले यसबारे प्रधानमन्त्री केपी शर्मा ओलीको जवाफ माग्नु पनि उचित नहुने बताए । ‘अब यसपछाडिको विषय के आउँछ भने संसद् प्रतिपक्षले अवरुद्ध गरेको छ । प्रधानमन्त्रीले संसद्मा जवाफ दिनुपर्छ भनेको छ । यसबारे मेरो जम्मा टिप्पणी के छ भने यो विषय अब अदालतको भइसक्यो’, उनले भने, ’सम्मानित अदालतमा गइसकेको विषयको सन्दर्भमा संसद् अवरोध गरिरहने कुरा उचित हुँदैन ।’
