किभ । अमेरिकी र रुसी अधिकारीहरूले साउदी अरबमा युक्रेन युद्ध रोक्नेबारे वार्ता गरिरहेका बेला रुसले युक्रेनमा कयौँ क्षेप्यास्त्र प्रहार गरेको छ । यस आक्रमणमा दर्जनौँ घाइते भएका छन् ।
अमेरिका र रुसबीच साउदी अरेबियाको राजधानी रियादमा सोमबार पछिल्लो चरणको वार्ता भइरहेको छ । यसको उद्देश्य रुस र युक्रेन बिचको युद्ध रोक्नु रहेको छ । यस वार्ताको एजेन्डा युक्रेनको लागि सन् २०२२ को अन्न सम्झौता पुनर्स्थापित गर्ने थियो, जस अन्तर्गत युक्रेनले कृष्ण सागर क्षेत्रबाट अन्न निर्यात गर्न सक्नेछ ।
यसको बदलामा रुसलाई पश्चिमा देशहरूले लगाएको प्रतिबन्धबाट राहत दिइनेछ । रुस र अमेरिकाबिच १२ घण्टादेखि वार्ता भइरहेको छ। रुसी समाचार एजेन्सीका अनुसार मंगलबार संयुक्त विज्ञप्ति जारी गरिनेछ ।
ह्वाइट हाउसको एक स्रोतले सोमबार रोयटर्स समाचार एजेन्सीलाई बताएअनुसार रियादमा भएको वार्ता निकै राम्रो भइरहेको छ । निकट भविष्यमा सकारात्मक घोषणा हुन सक्ने आशा ह्वाइट हाउसको छ । युक्रेन र अमेरिकाका प्रतिनिधिमण्डलहरू मंगलबार साउदी अरेबियामा भेट्नेछन् । यस अवधिमा सम्झौताबारे रूस र अमेरिकाबिच वार्तामा थप छलफल हुनेछ । यो जानकारी युक्रेनको सरकारी टिभी च्यानल सस्पाइनले दिएको हो ।
