बुटवल । लुम्बिनी प्रदेशका सभामुख तुलाराम घर्ती मगरले लुम्बिनी प्रदेशमा मगर भाषालाई सरकारी कामकाजी भाषाको रूपमा अङ्गीकार गराउने प्रतिबद्धता व्यक्त गरेका छन् ।
४३ औं मगर संघ स्थापना दिवसको अवसरमा आज बिहान शुभकामना सन्देश जारी गर्दै सभामुख घर्ती मगरले सरकारी कामकाजीको भाषाको रूपमा मगर भाषालाई समेट्न आफ्नो तर्फबाट लागिपरेको जनाएका छन् ।
मगर समुदायको आर्थिक सबलीकरणमा सहयोग पुग्ने गरी स्थानीय रैथाने उत्पादनलाई प्रवर्द्धन गर्ने नीतिगत व्यवस्थालाई मुर्तरुप दिने प्रयत्न भईरहेको बताए । उनले लुम्बिनी प्रदेश सभा विभिन्न जात–जाति, भाषा–भाषी, धर्म, संस्कृति, लिङ्ग, वर्ग, क्षेत्रको अधिकार स्थापित गर्ने सवालमा नीति तथा कानुन निर्माणमा प्रतिबद्ध रहेको उल्लेख गरेका छन् ।
राज्यले सबै समुदायका भाषा, संस्कृतिको प्रवर्द्धन गर्न सक्छ तर यसको संरक्षण गर्ने मुख्य जिम्मेवारी सम्बन्धित समुदायकै भएको उल्लेख गर्दै आफ्नो हक अधिकारलाई स्थापित गर्न तथा मगर भाषा, संस्कृतिको संरक्षण गर्न सबै मगर समुदायलाई एकताको मालामा गाँस्ने दिनको रूपमा मगर एकता दिवसलाई लिन समेत आग्रह गरेका छन् ।
