काठमाडौं । नेपाल कम्युनिस्ट पार्टीका महासचिव विप्लव सीले अमेरिकी सहयोगसम्बन्धी परियोजना मिलेनियम च्यालेन्ज कर्पोरेसन (एमसीसी) स्थगन गरेकोमा अमेरिकी राष्ट्रपति डोनाल्ड ट्रम्पलाई धन्यवाद दिएका छन् ।
डोनाल्ड ट्रम्पको कार्यकारी आदेशबाट स्थगन हुन पुगेको एमसीसी कम्प्याक्टले नेपाली जनताको संघर्ष र आवाजमा सकारात्मक प्रभाव पारेको छ । यसका लागि हाम्रो जनप्रिय पार्टी नेपाल कम्युनिस्ट पार्टी अमेरिकी राष्ट्रपति डोनाल्ड ट्रम्पप्रति हार्दिक धन्यवाद ज्ञापन गर्दछ’ आइतबार जारी विज्ञप्तिमा उल्लेख छ ।
विञप्तिमार्फत महासचिव सीले एमसीसी परियोजना सधैंका लागि खारेज गर्न आग्रह गरेका छन् । उनले लेखेका छन्, ‘एमसीसी कम्प्याक्टलाई सधैंको लागि खारेज गरी नेपाल र अमेरिका बीचको कुटनीतिक सम्बन्धलाई प्रगाढ बनाउन र नेपालको विकासमा निःस्वार्थ योगदन गर्न नयाँ विकास परियोजना मार्फत सहयोग अगाडि बढाउन आग्रह गर्दछौं ।’
एमसीसी कम्प्याक्टको तयारी र त्यसको कार्यन्वयनको समयदेखि नेपाली जनताले एमसीसी कम्प्याक्ट देशको राष्ट्रिय स्वाधिनता र आफ्नो राजनीनिक स्वतन्त्रताको विरुद्धमा हुने ठहर गर्दै आएको महासचिव विप्लव बताउँछन् । एमसीसीबारे चर्चा सुरु भएकै दिनबाट अनवरत संघर्ष संचालन गर्दै आएको पनि स्मरण गरेका छन् ।
एमसीसी अमेरिकी रणनीति भएको पनि उनले बताएका छन् । उनी अगाडि लेख्छन्, ‘एमसीसी कम्प्याक्ट हिन्द-प्रशान्त रणनीतिको अंग हो । एमसीसी कम्प्याक्टमार्फत देश र जनताले अकल्पनीय क्षति व्यहोर्नुपर्ने आम नेपाली जनताको जबर्जस्त मत रहँदै आएको छ ।’
गत जनवरीमा संयुक्त राज्य अमेरिकाको राष्ट्रपतिका रुपमा पदभार समालेपछि ट्रम्पले विदेशमा गरिने आर्थिक खर्च र सहायताको प्रभावकारिता एवम् निरन्तरताको विषयमा केन्द्रित भएर कार्यकारी आदेशमार्फत कटौती गरेका छन् । २० जनवरी २०२५ अर्थात, ७ माघ २०८१ मा वैदेशिक विकास सहायतालाई तीन महिना ९० दिन का लागि स्थगन गर्ने कार्यकारी आदेशमा हस्ताक्षर गरेका थिए ।
अमेरिकी राष्ट्रपति ट्रम्पको हस्ताक्षर आदेश सम्बन्धित निकायबाट जारी भएपछि विश्वभर एक किसिमको हलचल र तरंग पैदा भएको छ । नेपालमा पनि त्यसले प्रभाव पारेको छ ।
