पोखरामा एक कार्यक्रम उद्घाटनका क्रममा सुरक्षा लापरबाही हुँदा बेलुन विस्फोट भयो र अर्थमन्त्री विष्णु पौडेल तथा पोखराका मेयर धनराज आचार्य घाइते भए । प्रज्ज्वलनशील रसायन भरिएको बेलुनमा आगलागी भएपछि घाइते भएका दुवैको काठमाडौंस्थित कीर्तिपुर बर्न अस्पतालमा उपचार गरिएको छ । हाइड्रोजन ग्यास भरिएका बेलुनहरू फायर क्यान्डिलबाट निस्किएका झिल्काहरूसँग ठोक्किँदा विस्फोट भई आगोको मुस्लो निस्किएको थियो । उक्त आगोको मुस्लोले बेलुनको झुप्पा समाइरहेका अर्थमन्त्री पौडेल र मेयर आचार्यलाई छोपेको थियो । गृह मन्त्रालयले बेलुन विष्फोट प्रकरणबारे छानबिन गर्न आठ सदस्यीय समिति बनाएको छ । गृहमन्त्री रमेश लेखको निर्देशनमा बनेको समितिले १५ दिनमा प्रतिवेदन पेश गर्नुपर्नेछ । तर अहिले बेलुन विस्फोटमा देखिएको असावधानीका साथसाथै जनअसन्तुष्टिका विषय पनि अगाडि आएका छन् ।
देशको एउटा मुख्य दलका प्रमुख नेता तथा मेयर घाइते हुँदा सामाजिक सञ्जालमा सहानुभूति आउनुपर्ने हो, त्यसअनुसार टिप्पणी हुनुपर्ने हो । तर, त्यसविपरीत उक्त घटनाको भिडिओ र फोटो सामाजिक सञ्जालमा आएपछि अधिकांश पोस्टमा नकारात्मक टिप्पणी देखिएको छ । नेताहरू प्रति सहानुभूति वा दुःख प्रकट गरेका टिप्पणी विरलै भेटिन्छन् । जनताको यत्रो असन्तुष्टि किन त ? यो घटनामा मात्र नभई कुनै नेता दुर्घटनामा पर्दा वा कुनै भवितव्य हुँदा पनि जनताले सहानुभूति भन्दा नकारात्मक नै टिप्पणी गरेका भेटिन्टन् । यस्तो हुनुको कारण हो, नेताप्रति जनताको चरम वितृष्णा । यो यथार्थ हो कि नेताहरुको कार्यशैली जनताले मन पराएका छैनन् । सामाजिक सञ्जालमा राजनीतिज्ञहरूले नकारात्मक कमेन्टको सामना गरेको घटना नौलो होइन । हरेक दिनजसो कुनै न कुनै नेताको सामाजिक सञ्जालमा प्रयोगकर्ताहरू नकारात्मक कमेन्ट गर्ने अभियानमा लागिरहेका हुन्छन् ।
नेताहरुको उपचारको क्रममा देखिएको दृश्यले पनि जनतालाई अझ धेरै आक्रोशित बनाएको छ । यो घटनाअघि काठमाडौंको कमलपोखरीस्थित शानदार मम पसलमा सिलिन्डर विस्फोट हुँदा ११ जना घाइते भएका थिए, जसमध्ये ४ जनाको मृत्यु भएको छ । तर यो घटना हुँदा सरकारले बेवास्ता गरेकोमा जनताको आक्रोश छ । काठमाडौंमा वर्षेनि मम पसलको संख्या बढे पनि सरकारसँग त्यसको आधिकारिक तथ्यांक छैन । सुरक्षाको दृष्टिले त्यस्ता पसलले सामान्य मापदण्ड पनि पालना गरेका छैनन् । तर, सर्वसाधारणको सुरक्षा सरोकारसँग सम्बन्धित विषयमा भने सरकारले विरलै मात्रै चासो दिने गरेका छन् । यही कारण पनि नेतासँग सम्बन्धित घटनामा जनताले असन्तुष्टि व्यक्ति गर्दै आएका छन् ।
संसद्मै यो विषय उठेको छ । रास्वपाकी सांसद विनिता कठायतले समस्यामा परेका सबैको समान रूपमा उद्धार र उपचार हुनुपर्ने बताएकी छन् । तर, राज्यको व्यवहार सर्वसाधारण नागरिकका लागि एक र भीआईपीका लागि अर्को व्यवहार हुने गरेको उनको भनाइ थियो । राज्यले कमलपोखरीको दुर्घटनालाई कम महत्व दिएको उनले बताइन् । रेस्क्युको सवालमा यो देशमा भीआईपीहरूलाई हेलिकप्टर लगिन्छ । तर, आम जनताका लागि भने एम्बुलेन्स पनि समयमा पुग्दैन र पिकअप गाडीमा राखेर अस्पताल पु¥याइन्छ । संविधानले देशका सबै नागरिक समान रहेको भनेको छ, तर त्यस अनुसार व्यवहार हुन सकेको छैन । यो घटनाबाट नेताले केही सिक्ने कि ? जनधारणा साप्ताहिक
