एजेन्सी । भारतको नयाँ दिल्लीमा ‘भारत मोबिलिटी ग्लोबल एक्स्पो २०२५’ सुरु भएको छ ।
भारतीय प्रधानमन्त्री नरेन्द्र मोदीले शुक्रबार एक्स्पोको उद्घाटन गरे । उद्घाटनका क्रममा मोदीले भारतीय अटोमोटिभ उद्योग विशेष र भविष्यका निम्ति तयार रहेको बताए ।
जनवरी १७ देश २५ सम्म चल्ने एक्स्पोमा दर्जनौँ ब्रान्डका सवारीसाधन एवं अरू उत्पादन प्रदर्शनीमा राखिएको छ । प्रदर्शनीमा अटोमोबाइल निर्माता, कम्प्पोनेन्ट निर्माता, इलेक्ट्रोनिक पार्ट्स, टायर, ऊर्जा स्टोरेजदेखि अटोमोटिभ सफ्टवेयर फर्म र रिसाइकल गर्नेहरूसम्मको सहभागिता छ ।
भारतको उद्योग तथा वाणिज्य मन्त्रालयको सहयोगमा आयोजित भारत मोबिलिटी ग्लोबल एक्स्पोको यो दोस्रो संस्करण हो । भारत मण्डपम, एस भूमि र ग्रेटर नोयडामा गरी तीन भेन्युमा एक्स्पो आयोजना गरिएको छ ।
प्रदर्शनी दुई लाख वर्गकिलोमिटरमा फैलिएको छ । प्रदर्शनीमा विभिन्न नौ शो लगातार राखिएको छ ।
पाँच लाख दर्शकले एक्स्पो अवलोकन गर्ने आकलन गरिएको छ । यसमा पाँच हजारभन्दा बढी अन्तर्राष्ट्रिय व्यक्तिहरूको सहभागिता रहने अनुमान छ । पहिलो दिन विभिन्न ब्रान्डका कैयौँ नयाँ गाडी सार्वजनिक गरिएको छ । नेपालबाट नाडा अटोमोबाइल्स एसोसिएसन अफ नेपाल पनि एक्स्पोमा सहभागी छ ।
हुन्डाई, टाटा, सुजुकी, बीवाईडीलगायत अटोमोबाइल एवं होन्डा, हिरो, बजाजलगायत दुईपांग्रे सवारी निर्माता प्रदर्शनीमा छन् । एक्स्पोमा अमेरिका, बेलायत, कोरिया, जर्मनी, चीन, भारतलगायत देशका ब्रान्ड तथा कम्पनीको सहभागिता छ ।
एक्स्पोमा हुन्डाईको क्रेटा ईभी, मारुती सुजुकीको भीटारा ईभी र टाटा, महिन्द्रालगायत कम्पनीका नयाँ ईभी मोडल एवम् ब्रान्ड राखिएको छ ।
