काठमाडौं । मोबाइल डेटा प्रयोगकर्तामध्ये २ करोड ५२ लाख ६० हजारले फोरजी डेटा प्रयोग गर्ने गरेका छन् ।
नेपाल दूरसञ्चार प्राधिकरणले सार्वजनिक गरेको मंसिर महिनासम्मको तथ्यांक अनुसार मोबाइल डेटा प्रयोगकर्तामध्ये ९६ प्रतिशतले फोरजी चलाउँछन् भने ३ प्रतिशतले मात्रै थ्रीजी डेटा प्रयोग गर्ने गरेका छन् ।
तथ्यांकअनुसार नेपाल टेलिकम र एनसेलले फोरजी सेवा दिइरहेका छन् । मोवाइल डेटा सेवा दिने यी दुई कम्पनीको थ्रीजी ग्राहक भने कुल डेटा संख्याको न्यून भइसकेका छन् । हाल टेलिकमको थ्रीजी प्रयोगकर्ता ७ लाख ८१ हजार मात्रै छन भने यसका फोरजी ग्राहक १ करोड ३२ लाख पुगेको छ ।
एनसेलले पनि थ्रीजी प्रयोगकर्ता १ लाख ६१ हजार मात्रै छन भने कुल डेटा प्रयोगकर्ता १ करोड २० लाख रहेको नेपाल दूरसञ्चार प्राधिकरणले सार्वजनिक गरेको तथ्यांकले देखाएको छ । टेलिकम कम्पनीका द्रूतगतिको इन्टरनेट सेवा फोरजीका प्रयोगकर्ता बढेसँगै फाइभजीको खोजी हुन थालेको छ । तर, सेवाप्रदायक भने नेपालमा फाइभजी सेवा दिनै तयार छैन् ।
नेपाल टेलिकमले फाइभजीको विषयमा अध्ययन गरिरहेको भएपनि यसले २ वर्षदेखि निष्कर्ष दिन सकेको छैन् । सरकारले टेलिकमलाई मात्रै फाइभजी सेवाको परीक्षण गर्न अनुमति दिएको छ । तर टेलिकमले अपेक्षा अनुसारको नतिजा दिन भने सकेको छैन । प्रतिस्पर्धी कम्पनी एनसेललाई फाइभजीको परिक्षको अनुमति नै दिएको छैन् । एनसेलले अनुमति नपाएका कारण प्रयोगकर्ताले फाइभजीको सेवा पाउनबाट समेत बञ्चित भएका छन् ।
एनसेललाई टेलिकमसँगै फाइभजीको अनुमति नदिँदा नेपालको प्रविधिले लिनसक्ने फड्कोसमेत रोकिएको छ । प्राधिकरणको तथ्यांक अनुसार इन्टरनेट सेवा दिने आइएसपीका ग्राहक २६ लाख ३५ हजार पुगेका छन् । नेपाल टेलिकमको एफटीटीएचसमेतको सेवा अनुसार नेपालमा आइएसपीको ग्राहक संख्या २९ लाख ५२ हजार पुगेका छन् ।
