काठमाडौं । नेपाल समाजवादी पार्टीका अध्यक्ष एवं पूर्वप्रधानमन्त्री डा. बाबुराम भट्टराईले इजरायल–प्यालेस्टाइन युद्धबारे सरकारले आफ्नो धारणा स्पष्ट नपारेको भन्दै असन्तुष्टि व्यक्त गरेका छन्।
सोमबार काठमाडौंको रत्नपार्कमा प्यालेस्टीनीमाथि इजरायली जनसंहारविरूद्व देशव्यापी हस्ताक्षर अभियान उद्घाटन गर्दै उनले २१ औँ शताब्दीमा आएर इजरायलले प्यालेस्टाइनमाथि नरसंहार मच्चाएको आरोप लगाए।
उनले प्यालेस्टाइनी जनताको मुक्तिको लागि आवाज आफूहरुले आवाज उठाएको जनाए। उनले अहिलेको इजरायल राज्य वास्तवमा प्यालेस्टाइन राज्य भएको भन्दै सम्झौता गरेर दुई भागमा विभाजित गरेपछि पनि एकअर्कालाई नस्वीकार्ने कुरा गम्भीर रहेको जनाए।
संयुक्त राष्ट्रसंघमा भएको मतदानमा नेपाल तटस्थ बस्नु गलत भएको र नेपालले सत्य र न्यायको पक्षमा मतदान गर्नुपर्ने जनाए। उनले सत्य र न्यायको पक्षमा बोल्न नसक्ने कुराले मानव हुनुको अर्थ नराख्ने र नेपाली हुनुको अर्थ नहुने जनाए।
उनले भने, ‘२१ औँ शताब्दीमा आएर अहिले इजरायलले जसरी प्यालेस्टाइनमाथि नरसंहार मच्चाएको छ, अस्पतालमा बम वर्षाएको छ, स्कुलमा बम वर्षाएको छ। गाजा क्षेत्रमा त्यहाँका प्यालेस्टाइनी नागरिकहरुलाई नरसंहार गरेर त्यो क्षेत्र नै खाली गर्ने ढंगले अघि बढ्ने गरेर गएको छ। यति क्रुर नरसंहार २१ औँ शताब्दीमा हुनु सबैको निम्ति लज्जाको विषय हो। हामी थोरै भए पनि जिउँदा मान्छे नेपालमा अझै रहेछौँ। हामी सत्य र न्यायको पक्षमा बोल्न डराइरहेका छौँ। नेपाल राज्य शान्तिको पक्षमा सधैँ उभिँदै आएको छ। हामीले सधैँ प्यालेस्टाइनी जनताको मुक्तिको लागि आवाज उठाइरहेका छौँ।’


