काठमाडाैं । चितवनमा राष्ट्रिय स्वतन्त्र पार्टीका सभापति रवि लामिछाने पक्राउको विरोध गर्दै प्रदर्शनमा उत्रिएका ४० जना भन्दा धेरै रास्वपाका नेता समर्थक घाइते भएका छन् । सभापति पक्राउको विरोधका शान्तिपूर्ण ढंगले सडमा उत्रिएकामाथि प्रहरीले दमन गरेको रास्वपाका सहमहामन्त्री कबिन्द्र बुर्लाकोटीले जनाए ।
बुधबार दिउँसो चितवनको चौविसकोटीबाट आएको रास्वपा जुलुसलाई प्रहरीले रोक्न खोज्दा २ पक्षबिच झडप भएको थियो । झडप हुँदा ३ दर्जन बढी नेता कार्यकर्ता घाइते भएका र केहीको अवस्था गम्भिर रहेको रास्वपाले जनाएको छ । रास्वपाका चितवन जिल्ला सभापति कृष्ण भुसालसहितका नेताहरु घाईते भएका हुन् । प्रदर्शनकारीलाई प्रहरीले टियर ग्यास र पानीको फोहोरा प्रहार गरेको थियो ।
घाइतेहरुको उपचार भरतपुर लगायतका अस्पताल भइरहेको सहमहामन्त्री बुर्लाकोटीले जनाए ।
सहकारी रकम बचत अपचलनमा अनुसन्धान गर्न कात्तिक २ गते पक्राउ परेका लामिछानेलाई यतिबेला चितवनमा साहारा सहकारीको रकम अपचलनको अनुसन्धान गर्न चितवन लगिएको छ। मंगलबार बिहान लामिछानेलाई चितवन पुर्याएसँगै रास्वपा नेता कार्यकर्ता निरन्तर प्रदर्शनमा छन् ।
