वीरगञ्ज । वीरगञ्जको नारायणी अस्पतालमा क्यान्सर रोग उपचार सेवाको उद्घाटन गरिएको छ।
मंगलबार स्वास्थ्य तथा जनसङ्ख्या मन्त्री प्रदिप पौडेलले एक कार्यक्रमकाबीच नारायणी अस्पतालमा क्यान्सर रोग उपचार सेवाको रिबन काटेर उद्घाटन गरेका हुन।
सेवाको उद्घाटन गर्दै उनले सरकारी अस्पतालमा बिरामीलाई चाहिने सबै सेवाहरू उपलब्ध हुने गरि काम गर्ने बताए। उनले भने,’ क्यान्सरका बिरामीहरू दिनप्रतिदिन बढिरहेका छन, क्यान्सर भएर भएभरको सम्पति सकिएको महिनाकै ८० हजारसम्म खर्च गर्नुपर्ने अवस्था रहेको गुनासोहरू क्यान्सर रोगका बिरामीका आफन्तले मसँगै गरेका छन्। त्यसकारण धनी र गरिब सबैले स्वास्थ्य सेवा सामान ढङ्गले पाउनु पर्ने स्थिति हुनुपर्छ।’
स्वास्थ्य उपचारमा सबैको पहुँच स्थापित गर्न स्वास्थ्य बिमालाई व्यवस्थित गर्दै एकलाख बाट बढाइ पाँचलाख सम्म पुर्याउन जरुरी रहेको उनले उल्लेख गरे।
उनले चिकित्सकले सरकारी भन्दा निजी अस्पतालमा काम गर्दा बढी सेवा सुविधा पाउने गरेको भएपनि बिरामीको पीडामा मलम लगाउने क्षमता चिकित्सकमा हुँदा सरकारी अस्पतालमा पनि बढी समय दिन चिकित्सकहरूलाई आग्रह गरे।
सरकारी र निजी अस्पताल सफा गर्ने कम्पनी एउटै भएपनि सरकारी अस्पताल सफा नहुनुमा कसको कमजोरी हो र यसमा ध्यान दिनपर्ने उनकाे भनाइ थियाे।
बिदाको दिनमा पनि स्वास्थ्यकर्मीहरू अस्पताल आउँदा कामको प्रेसर हुने भएकाले अन्य समयमा बिदा लिन सकिने गरि मन्त्रालयले काम गरिरहेकाे उनले जानकारी दिए।
उनले सरकारी अस्पतालहरुका मेडिकल पसललाई नागरिक बडापत्र राखेर औषधिको बिक्री गर्न निर्देशन दिए। नारायणी अस्पतालमा लामो समयदेखि बन्द रहेकाे एमआरआई मेशिन एक हप्तामा सञ्चालन हुने उनकाे भनाइ थियाे।
