काठमाडौँ / प्रधानमन्त्री केपी शर्मा ओली र चीन अन्तर्राष्ट्रिय विकास सहयोग एजेन्सी (सीआईडीसीए)का उपाध्यक्ष याङ वेईकुनबीच भेटवार्ता भएको छ ।
चिनियाँ उच्च अधिकारीसँगको भेटमा नेपालको विकासमा चीनको सहयोगबारे कुराकानी भएको थियो । चीन अन्तर्राष्ट्रिय विकास सहयोग एजेन्सी अरु देशलाई विकासमा सहयोग गर्ने संस्था हो ।
प्रधानमन्त्री निवास बालुवाटारमा भएको भेटमा बिहीबार उपप्रधान एवं अर्थमन्त्री विष्णुप्रसाद पौडेलसँग भएको छलफल र सहमतिबारे प्रधानमन्त्री ओलीलाई जानकारी गराइएको छ । बिहीबार नै अर्थ मन्त्रालयमा चिनियाँ पक्षबीच काठमाडौं चक्रपथको कलंकीदेखि बसुन्धरा महाराजगन्जसम्मको ८.२ किलोमिटर सडक निर्माण, हिल्सा–सिमिकोट सडक खण्डलाई दुई लेनमा स्तरोन्नति, मुस्ताङको कोरला नाकामा आइसीपी र आइसीडी निर्माण र अरनिको राजमार्गको मर्मत सुधार तथा पहिरो नियन्त्रणसम्बन्धी कार्यको सम्भाव्यता अध्ययन गर्ने सम्बन्धी चारवटा छुट्टाछुट्टै सहयोग आदानप्रदानसम्बन्धी पत्रमा हस्ताक्षर भएको थियो ।
भेटमा नेपालका लागि चिनियाँ राजदूत छन सोङको पनि उपस्थिति थियो ।
