जनकपुरधाम / नागरिकतासम्बन्धी कसुरमा पक्राउ परेका कान्तिपुर मिडिया ग्रुपका अध्यक्ष कैलाश सिरोहियालाई थप ३ दिन हिरासतमा राख्न अदालतले अनुमति दिएको छ।
जिल्ला अदालत धनुषाले सोमबार उनलाई थप तीन दिन हिरासतमा राख्न अनुमति दिएको हो।
गत मंगलबार पक्राउ परेका उनलाई बुधबार जिल्ला अदालत धनुषामा पेश गरिएको थियो। पहिलो पटक अदालतले अनुसन्धानका लागि तीन दिनको म्याद दिएको थियो। दोस्रो पटक शुक्रबार अदालतसमक्ष पेश गरिएका सिरोहियालाई अर्को थप तीन दिन थुनामा राख्न अदालतले अनुमति दिएको थियो।
आज तेस्रो पटक अदालतमा पेश गरिएका सिरोहियाको तर्फबाट विनोद शर्मा, किशोर पौडेल, रमण कर्ण र दिनेश त्रिपाठीले बहस गरेका थिए।
सिरोहियाको स्वास्थ्यमा समस्या देखिएपछि उनलाई जनकपुरधामस्थित काव्या अस्पतालमा भर्ना गरिएको थियो। उनलाई आज पनि अस्पतालकै एम्बुलेन्सबाट अदालतमा उपस्थित गराइएको थियो।
