प्रधानमन्त्री पुष्पकमल दाहाल ‘प्रचण्ड’, एमाले अध्यक्ष केपी शर्मा ओली र उपप्रधानमन्त्री तथा गृहमन्त्री रवि लामिछानेबीच छलफल चलिरहेको छ । सदन खुलाउने विषयमा नेपाल कांग्रेसले आफ्नो अडान यथावत राखेका बेला सत्ता पक्षका प्रमुख तीन नेताबीच छलफल भएको हो ।
कांग्रेसले सहकारीको रकम घोटालामा लामिछानेमाथि संसदीय समिति बनाएर छानबिन गर्नुपर्ने माग गर्दै आएको छ । तर, सत्तापक्ष त्यसमा तयार भएको छैन । यही अडानका बीच बिहीबारको संसद बैठक तनावपूर्ण बनेको थियो ।
सिंहदरबारमा जारी छलफलमा पछिल्लो राजनीतिक घटनाक्रम, संसद अवरोध तथा कांग्रेसका मागका विषयमा कुराकानी भएको बताइएको छ ।
यता बानेश्वरमा प्रतिपक्षी दलहरूबीच छलफल चलेको छ । कांग्रेस सभापति शेरबहादुर देउवाले प्रतिपक्षी दलहरूको बैठक बोलाएका हुन् ।
त्यस्तै आजै कांग्रेस संसदीय दलको बैठक बसेको थियो । उक्त बैठकले संसदीय छानबिन समितिको मागमा यथावत रहने निर्णय गरेको छ । साथै सदनमा सभामुखको भूमिकालाई लिएर पनि कांग्रेसले प्रश्न उठाएको छ ।
