काठमाडौँ / सुदूरपश्चिम प्रदेशसभाको शनिबारकाे लागि तय भएको बैठक स्थगित भएको छ। मुख्यमन्त्री दीर्घ सोडारीले प्रदेशसभाबाट विश्वासको मत लिने कार्यसूची भएको बैठक स्थगित भएको प्रदेशसभा सचिवालयले जनाएको छ।
अर्को सूचना जारी नभएसम्मको लागि आजको बैठक स्थगित भएको प्रदेश सभा सचिवालयले जनाएको छ। विश्वासको मत लिने प्रयोजनका लागि भन्दै प्रदेशसभाको बैठक आज(शनिबार) बेलुका ५ बजेपछिको लागि आह्वान गरिएको थियो।
सत्ता साझेदार दल नेकपा एमालेको असन्तुष्टिका कारण नेकपा एकीकृत समाजवादी(नेकपा एस) बाट प्रदेशका मुख्यमन्त्री बनेका सोडारीले विश्वासको मत लिने कार्य अन्योलमा परेको थियो। आफूसँग छलफल नै नगरी विश्वासको मत लिने प्रक्रिया अघि बढाएको भन्दै एमालेले असन्तुष्टि जनाउँदै आएको थियो।
सोही अन्योलता बढेपछि अन्तत आजको लागि तय भएको बैठक पनि स्थगित भएको हो। यसअघि (हिजो) शुक्रबार बेलुका ५ बजे बोलाइएको प्रदेशसभा बैठक पनि बस्दै नबसी स्थगित भएको थियो। यसअघि कार्यव्यवस्था परामर्श समितिको बैठक पनि बस्न सकेको छैन।
एमालेले केन्द्रमा परामर्श नगरी र आन्तरिक छलफल नगरी मुख्यमन्त्रीलाई विश्वासको मत नदिने अडान लिएपछि बैठक स्थगित भएको थियो। उपचुनावमा बझाङबाट निर्वाचित आफ्ना उम्मेदवार दमन भण्डारीको शपथ नभएसम्म एमालेले विश्वासको मत नदिने अडान राख्दै आएको छ।
