काठमाडौं । नेपाली कांग्रेसका सांसद दिलेन्द्रप्रसाद बडूले सहकारी प्रकरणलाई निष्पक्ष रुपमा छानबिन गर्न गृहमन्त्री रवि लामिछानेले राजीनामा माग गरेका छन्।
बुधबार प्रतिनिधि सभा अन्तर्गतको राज्य व्यवस्था तथा सुशासन समितिको बैठकमा बोल्दै सांसद बडूले सहकारीको रकम हिनामिना प्रकरणमा गृहमन्त्री रवि लामिछानेको पनि नाम जोडिएको भन्दै निष्पक्ष छानविनका लागि पद छोड्नु उपयुक्त हुने सुझाव दिए।
उनले छानबिनको निष्पक्षता र विश्वसनीयतालाई सुनिश्चित गर्न गृहमन्त्रीले स्वेच्छिक रुपमा जिम्मेवारीबाट बाहिरिनुपर्ने भन्दै बाँसबारी छाला, जुत्ता कारखानाको जग्गा प्रकरणमा कांग्रेस सांसद विनोद चौधरीलाई छानबिन गर्ने भनि सभामुखलाई प्रहरीले पत्र लेखेको प्रति असन्तुष्टि व्यक्त गरे।
उनले संविधानको कुन व्यवस्था अनुरुप सांसदको छानबिन गरिँदैछ भनी पत्र लेखेको हो भने स्पष्ट पार्न माग गरे। उनले सांसद चौधरीमाथि पूर्वाग्रहवश अनुसन्धान गरिएको हो कि भन्ने आशंका पैदा भएको बताए।
‘संविधानमा यो व्यवस्था छैन कि कसैमाथि छानबिन हुँदैछ है भनेर पूर्वजानकारी गराइदिएर चिट्ठी लेख्नुपर्ने कारण के रहेछ? कुन संविधानको व्यवस्था हो? कुन नियमावलीको व्यवस्था हो? हामी बुझ्न सकिरहेका छैनौं। त्यसकारण यो कसैलाई ह्यारेसमेन्ट गर्ने मात्रै उद्देश्य हो कि? अनुमान त जे पनि लगाउन सकिने भयो। सावधान होउ यस्तो हुँदैछ, आफ्नो ठाउँ लिइहाल भनेको पो हो कि? के अर्थ हो यसको? हामी बुझ्न सकिरहेका छैनौं?’ बडूले भने, ‘यसले कतै, कुनै किसिमको पूर्वाग्रह राखेको हो कि? शंकाको ठाउँ छ। यसलाई स्पष्ट गरिदिनुपर्छ किन? एउटा सांसद हो सबभन्दा पहिले। त्यसपछि व्यवसायी हो। कानुनभन्दा ठुलो कोही पनि हुन सक्दैन। तर त्यसको प्रयोग कसरी हुन्छ? कति निष्पक्ष, स्वच्छ र विश्वसनीय ढंगले अगाडि बढिरहेका छौं भन्नेकुरा जनताले अनुभूति गर्नेगरी हुनुपर्छ। किन चिट्ठी लेख्ने काम भयो र यसको जवाफ के दियो संसदले? त्यो जानकारीमा आएको छैन। यसलाई स्पष्ट गरिदिनुपर्ला। सहकारी प्रकरणमा आरोपीहरु कति समातिए? छानबिन प्रक्रिया कहाँ पुग्यो। स्पष्ट पारिदिनुस्। ग्यालेक्सी टेलिभिजनमा १० करोड रुपैयाँ आएको को कि होइन? १ करोड रुपैयाँ रवि लामिछानेको नाममा जम्मा भएको भन्ने आयो। यदि यो उहाँ नै हो भने छानबिनको निष्पक्षता र विश्वसनीयतालाई अझ सुनिश्चित गर्नका निमित्त यदि त्यसो हो भने गृहमन्त्रीजी स्वयम् हो भन्ने उहाँलाई लागेको छ भने मलाइ लाग्छ उहाँले यो छानबिन निष्पक्ष हुन र विश्वसनीय बनाउनको निम्ति, जनतालाई पनि विश्वसनीय ढंगले छानबिन गरे है भन्ने पार्नको निम्ति उहाँले छानबिन नसकिदाँसम्म म जिम्मेवारीबाट बाहिरिन्छु भनेर गर्दा हुन्थ्यो भन्ने हाम्रो अपेक्षा हो। त्यसकारण यो अवस्था हुन्छ कि हुँदैन? त्यो भइदियो भने छानबिन निष्पक्ष र विश्वसनीय हुन्छ। अहिलेको आवश्यकता नै त्यति हो।’
सांसद बडूले सांसद विनोद चौधरीलाई अनुसन्धान गरेर ह्यारेसमेन्ट गर्न खोजिएको भनेर पनि प्रश्न गरे।
